ବାଲୁଗାଁ: ବାତ୍ୟା ଫାଇଲିନ ଓ ତିତିଲିର ଭୟ ଲୋକଙ୍କ ମନରୁ ଲିଭି ନ ଥିବା ବେଳେ ଆଜି ସାମୁଦ୍ରିକ ବାତ୍ୟା ଫନିର ପ୍ରଭାବ ଖୋର୍ଦ୍ଧା ଜିଲ୍ଲାର ବାଲୁଗାଁରେ ବିଭୀଷିକା ରଚିଛି । ଗତକାଲି ଠାରୁ ତୁହାକୁ ତୁହା ବର୍ଷା ସାଙ୍ଗକୁ ଆଜି ସକାଳୁ ଦ୍ରୁତଗତିରେ ପବନ ବହିବା ସହ ବର୍ଷା ଲାଗି ରହିଛି । ବର୍ଷା ଓ ପବନରେ ବାଲୁଗାଁ ଓ ତାର ଆଖପାଖ ଅଞ୍ଚଳରେ ବଡ଼ ବଡ଼ ଗଛ ଉପୁଡି ଯିବା ସହ କେତେକ ଦୋକାନର ଟିଣ ଛପର ଓ ଆଜବେଷ୍ଟ ଉଡ଼ିଯାଇଛି ।
ସେହିପରି ବାଲୁଗାଁ କଲ୍ୟାଣ ମଣ୍ଡପ ସମ୍ମୁଖରେ ଥିବା ମୋଟର ଗ୍ୟାରେଜ ନିକଟରେ ଏକ ବୋଲେରୋ ଗାଡି ଉପରେ ଗଛ ପଡି ଗାଡିଟି ସମ୍ପୂର୍ଣ୍ଣ ଭାଙ୍ଗି ଯାଇଥିଲା । ବିଭିନ୍ନ ସ୍ଥାନରେ ଗଛ ଓ କାନ୍ଥ ପଡି ଲୋକମାନେ ଆହତ ହୋଇଛନ୍ତି । ବାଣପୁର ଥାନା ଅନ୍ତର୍ଗତ କୁମାଣ୍ଡଳ ପଞ୍ଚାୟତର ହରିକୁଣ୍ଡ(ବରଡ଼ି)ର ଆଶୁତୋଷ ରଣା(20)ଙ୍କ ଉପରେ କାନ୍ଥ ପଡିବାରୁ ସେ ଆହତ ହୋଇଥିଲେ । ତାଙ୍କୁ ବାଲୁଗାଁ ସରକାରୀ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା । କିନ୍ତୁ ଅବସ୍ଥା ଗୁରୁତର ହେବାରୁ ତାଙ୍କୁ ଭୁବନେଶ୍ବରସ୍ଥିତ ଏମ୍ସକୁ ସ୍ଥାନାନ୍ତର କରାଯାଇଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
