Dengue Menace: ଆଗାମୀ ବର୍ଷ ଆସିବ ଡେଙ୍ଗୁ ଟିକା !

ସରିଛି ଡେଙ୍ଗୁର ଫେଜ 1 ଏବଂ ଫେଜ 2 ଟ୍ରାଏଲ । ଡିସେମ୍ବର ମାସରେ ଫେଜ 3ର ଟ୍ରାଏଲ ପରେ ଆସିପାରେ ଡେଙ୍ଗୁ ଭ୍ୟାକ୍ସିନ । ଅଧିକ ପଢନ୍ତୁ

ଭୁବନେଶ୍ବର: ରାଜ୍ୟରେ ଡେଙ୍ଗୁ ଦିନକୁ ଦିନ ବଢ଼ିବାରେ ଲାଗିଛି । ସରକାରୀ ସ୍ତରରେ ସଚେତନ କରାଯାଉଥିଲେ ମଧ୍ୟ ଡେଙ୍ଗୁ କମିବାର ନାଁ ଧରୁନି । ତେବେ ଡେଙ୍ଗୁ ମୁକାବିଲା ପାଇଁ ସ୍ବାସ୍ଥ୍ୟ ବିଭାଗ ପ୍ରସ୍ତୁତ ଥିବା ବିଜୟ ମହାପାତ୍ର କହିଛନ୍ତି । ଡେଙ୍ଗୁ ରୋଗର ପ୍ରତିଶେଧକ ନଥିବା ବେଳେ ଭ୍ୟାକ୍ସିନ ପ୍ରସ୍ତୁତ କରାଯାଉଥିବା ସ୍ବାସ୍ଥ୍ୟ ବିଭାଗ କହିଛି ।

ସ୍ବାସ୍ଥ୍ୟ ବିଭାଗ ନିର୍ଦ୍ଦେଶକ ବିଜୟ ମହାପାତ୍ର କହିଛନ୍ତି,"ରାଜ୍ୟରେ ପ୍ରତ୍ଯେକଟି ଜିଲ୍ଲାର ମୁଖ୍ୟ ଚିକିତ୍ସାଳୟରେ 10ଟି ଡେଙ୍ଗୁ ବେଡ୍‌ର ବ୍ୟବସ୍ଥା କରାଯାଇଛି । ମେଡିକାଲ କଲେଜ ସମେତ କ୍ୟାପିଟାଲ ହସ୍ପିଟାଲରେ ମଧ୍ୟ ଡେଙ୍ଗୁ ପାଇଁ ବେଡ୍‌ ପ୍ରସ୍ତୁତ ହୋଇ ରହିଛି । ଭୁବନେଶ୍ବରରେ ଅଧିକରୁ ଅଧିକ ଡେଙ୍ଗୁ ରୋଗୀ ଆଡମିଶନ ହେଉଥିବାରୁ କ୍ୟାପିଟାଲ ହସ୍ପିଟାଲରେ 50ଟିରୁ 70ଟି ଡେଙ୍ଗୁ ବେଡ୍‌ ବୃଦ୍ଧି କରାଯାଇଛି । ରାଜ୍ୟରେ ଅର୍ବାନ ହସ୍ପିଟାଲମାନଙ୍କରେ ମଧ୍ୟ 10ଟି ଲେଖାଏଁ ବେଡ୍‌ ରଖାଯାଇଛି । ଯଦି କୌଣସି ସ୍ଥାନରେ ବେଡ୍‌ ବଢ଼ାଇବା ଆବଶ୍ୟକ ହୁଏ ତେବେ ସେହି ହସ୍ପିଟାଲରେ ମଧ୍ୟ ବେଡ ସଂଖ୍ୟା ବୃଦ୍ଧି କରାଯାଉଛି । ଅନ୍ୟପଟେ ଡେଙ୍ଗୁ ପାଇଁ କୌଣସି ମେଡ଼ିସିନ କି ଭ୍ୟାକ୍ସିନ ନାହିଁ । ତେଣୁ ସମସ୍ତ ରକ୍ତ ଭଣ୍ଡାର ଏବଂ ହସ୍ପିଟାଲରେ ପ୍ଲେଟଲେଟ୍‌ ଅଧିକ ପରିମାଣରେ ରହିଛି । ଉଭୟ ସରକାରୀ ଏବଂ ଘରୋଇ ହସ୍ପିଟାଲକୁ ମଧ୍ୟ ଯୋଗାଇ ଦିଆଯାଉଛି ।"

ଏହାସହ ସେ ଆହୁରି ମଧ୍ୟ କହିଛନ୍ତି, "ଡେଙ୍ଗୁରେ 4ଟି ଭାରିଏଣ୍ଟ ରହିଛି । ଯାହା ଡେନ୍‌ 1, 2, 3, 4 । ଡେନ୍‌ 2 ଭାରିଏସ ଅଧିକ ବିପଦ ଅଟେ । କୋଭିଡ ସମୟରେ ଯେଉଁଭଳି ଭାବରେ ଭେରିଏଣ୍ଟ ପରିବର୍ତ୍ତନ ହୋଇଥାଏ ସେହିଭଳି ଭାବରେ ଡେଙ୍ଗୁର ଭେରିଏଣ୍ଟ ପରିବର୍ତ୍ତନ ହେଉନାହିଁ । ଡେଙ୍ଗୁ ପାଇଁ ଦୁଇଟି ଟୀକା ଫେଜ୍‌ 1 ଏବଂ ଫେଜ୍‌ 2 ଟ୍ରାଏଲ ସରିଛି । ଏହି ଟ୍ରାଏଲ 18 ବର୍ଷରୁ 60 ବର୍ଷ ବୟସଙ୍କ ମଧ୍ୟରେ କରାଯାଇଛି । ଡିସେମ୍ବର ମାସରେ ଫେଜ୍‌ 3ର ଟ୍ରାଏଲ କରାଯିବ । ଏଥିରେ ଛୋଟ ପିଲାଙ୍କୁ ସାମିଲ କରାଯିବ । ତେବେ ଆଶା କରାଯାଉଛି ଆଗାମୀ ବର୍ଷରେ ଡେଙ୍ଗୁର ଟୀକା ଆସିପାରେ । ଲୋକଙ୍କ ମାନସିକ ପରିବର୍ତ୍ତନ ହେଲେ ଡେଙ୍ଗୁଠାରୁ ଦୂରେଇ ହେବ । ତେଣୁ ଆପଣ ସତର୍କ ରହିଲେ ଡେଙ୍ଗୁ ସମ୍ଭାବନା କମ ରହିବ ।"

ଇଟିଭି ଭାରତ, ଭୁବନେଶ୍ବର