ଭୁବନେଶ୍ବର: ଦୀର୍ଘ 29 ବର୍ଷ ଧରି ଓଡିଶାର ଉଚ୍ଚ ନ୍ୟାୟାଳୟକୁ ରାଜଧାନୀକୁ ସ୍ଥାନାନ୍ତର ପାଇଁ ଭୁବନେଶ୍ବର ବାର୍ ଆସୋସିଏସନ ପକ୍ଷରୁ ଦାବି କରାଯାଉଛି । ହେଲେ ସରକାରଙ୍କ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବାରୁ ବାର୍ ଆସୋସିଏସନ କ୍ଷୁବ୍ଧ ହୋଇଛି । ଆଗକୁ ଯଦି ଏ ଦିଗରେ ଆସୋସିଏସନ ସହ କୌଣସି ଆଲୋଚନା କରା ନଯାଏ ତେବେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବ ବୋଲି ଉପସଭାପତି ଶୀଳଭଦ୍ର ଶାସ୍ତ୍ରୀ କହିଛନ୍ତି ।
ଶାସ୍ତ୍ରୀ ପୁଣି କହିଛନ୍ତି, ଆଇନ୍ ଅନୁସାରେ ରାଜ୍ୟ ରାଜଧାନୀରେ ହାଇକୋର୍ଟ ରହିବାର ବ୍ୟବସ୍ଥା ରହିଛି । ବାରମ୍ବାର ଦାବି ସତ୍ତ୍ବେ ସରକାର ଏଥିପ୍ରତି ଧ୍ୟାନ ଦେଉ ନାହାନ୍ତି । ଏହା ଛଡା କଟକରୁ ଭୁବନେଶ୍ବର ହାଇକୋର୍ଟ ସ୍ଥାନାନ୍ତର ହେଲେ ସରକାରଙ୍କ ଟ୍ରେଜେରୀରୁ ଖର୍ଚ୍ଚ ହେଉଥିବା କୋଟି କୋଟି ଟଙ୍କା ସଞ୍ଚୟ ହେବା ସଙ୍ଗେସଙ୍ଗେ ରାଜ୍ୟବାସୀ ବିଶେଷ ଭାବେ ଉପକୃତ ହୋଇପାରିବେ ବୋଲି ଉପସଭାପତି ଦୃଢୋକ୍ତି ପ୍ରକାଶ କରିଛନ୍ତି । ସେହିପରି ସରକାର ଧୈର୍ଯ୍ୟଚ୍ୟୁତି ହେବା ପୂର୍ବରୁ ଏନେଇ ଆଲୋଚନା କରିବାକୁ ସଂଘର ସମ୍ପାଦକ ବିଶ୍ବନାରାୟଣ ମହାନ୍ତି କହିଛନ୍ତି ।