ଭୁବନେଶ୍ବର: ଟାଟା ପାୱାର ବିଦ୍ୟୁତ ବଣ୍ଟନରେ ବ୍ୟାପକ ଅବହେଳା କରୁଥିବା ନେଇ ରାଜ୍ୟ ସରକାରଙ୍କ ଉପରେ ବର୍ଷିଲେ ପୂର୍ବତନ ଅର୍ଥମନ୍ତ୍ରୀ ତଥା କଂଗ୍ରେସ ନେତା ପଞ୍ଚାନନ କାନୁନଗୋ । ପଞ୍ଚାନନ ରାଜ୍ୟ ସରକାରଙ୍କୁ ୪ଟି ପ୍ରଶ୍ନ ପଚାରିଛନ୍ତି । ପ୍ରଥମ ପ୍ରଶ୍ନଟି ହେଲା ଟାଟା ପାୱାର ବିଦ୍ୟୁତ ବିଲ ଦେବା ବେଳେ ତାରିଖ ଏପଟ ସେପଟ କରୁଛି । ଗୋଟିଏ ମାସରେ ୪ ତାରିଖରେ ବିଲ ଦେଇଥିବା ବେଳେ ପରବର୍ତ୍ତୀ ମାସରେ ୧୪ ତାରିଖରେ ବିଲ ଦେଉଛନ୍ତି । ତାରିଖ ବଢାଇବା କାରଣରୁ ସ୍ଲାବ ବଢୁଛି । ଫଳରେ ଉପଭୋକ୍ତାମାନେ ୨୭ରୁ ୩୦ ଟଙ୍କା ଅଧିକ ବିଲ ଦେଉଛନ୍ତି । ଏପରି କାହିଁକି ହେଉଛି ଏବଂ ଏଥିପାଇଁ କିଏ ଦାୟୀ ରାଜ୍ୟ ସରକାର କହିବେ କି ବୋଲି ସେ ପ୍ରଶ୍ନ ପଚାରିଛନ୍ତି ।
ରାଜ୍ୟ ସରକାରଙ୍କୁ ପଞ୍ଚାନନଙ୍କ ଦ୍ବିତୀୟ ପ୍ରଶ୍ନ ହେଲା, ବିଦ୍ୟୁତ ବିଲରେ ସ୍ଲାବକୁ ୫୦ରୁ ୧୦୦ ୟୁନିଟକୁ ବୃଦ୍ଧି କରାଯାଇଛି । ଯାହା ଫଳରେ ସାଧାରଣ ଉପଭୋକ୍ତାଟିଏ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛି । ତେଣୁ ତୁରନ୍ତ ଟାଟା ପାୱାର ଏହି ସ୍ଲାବକୁ କମାଇବା ଉପରେ ଗୁରୁତ୍ବ ଦେଉ ବୋଲି ଦାବି କରିଛି କଂଗ୍ରେସ । କେବଳ ସେତିକି ନୁହେଁ, ପାୱାର କଟ୍ କାହିଁକି ହେଉଛି ପ୍ରଶ୍ନରେ ଶକ୍ତି ମନ୍ତ୍ରୀ କହୁଛନ୍ତି ଯାନ୍ତ୍ରୀକ ତ୍ରୁଟି । ଏହାକୁ ସମାଲୋଚନା କରିଛି କଂଗ୍ରେସ । କଂଗ୍ରେସ କହିଛି, "ଭିତ୍ତିଭୂମି ସଜାଡ଼ିବା ପାଇଁ ରାଜ୍ୟ ସରକାର ୪୨ ହଜାର କୋଟି ଟଙ୍କା ଖର୍ଚ୍ଚ କରିସାରିଛନ୍ତି । ତଥାପି ଯାନ୍ତ୍ରୀକ ତ୍ରୁଟି କାହିଁକି ଆସୁଛି ? ଯଦି ଆସୁଛି, ଏହାକୁ ସୁଧାରିବା କାମ କାହାର ? ଶକ୍ତିମନ୍ତ୍ରୀ ଉତ୍ତର ଦେବେ କି ଏହି ଯାନ୍ତ୍ରୀକ ତ୍ରୁଟି କେବେ ସୁଦ୍ଧା ସୁଧୁରି ଯିବ ?"