ଭୁବନେଶ୍ବର: ମନ୍ତ୍ରୀ ନବ ଦାସ ହତ୍ୟା ମାମଲା ଉପରୁ ଆଜିଯାଏଁ ହଟି ପାରିନି ରହସ୍ୟ । ଦୁଇ ଦୁଇଥର ରିମାଣ୍ଡରେ ନେବାପରେ ଆଜି ତୃତୀୟ ଥର ପାଇଁ ଅଭିଯୁକ୍ତ ଗୋପାଳକୁ ରିମାଣ୍ଡରେ ନେଇଛି କ୍ରାଇମବ୍ରାଞ୍ଚ । ତେବେ ଏହି ଘଟଣାର ନ୍ୟାୟ ପ୍ରକ୍ରିୟା ବିଳମ୍ବିତ ହେବାକୁ ଯାଉଛି ବୋଲି ଆଶଙ୍କା କରିଛନ୍ତି ବରିଷ୍ଠ ସାମ୍ବାଦିକ ଅକ୍ଷୟ ସାହୁ । ସେପଟେ ଆଜି ପର୍ଯ୍ୟନ୍ତ ଗୋପାଳ ଅନୁତାପ ନକରିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ତେଣୁ ଗୋପାଳ ପଛରେ ବଡ଼ ବଡିଆଙ୍କ ହାତ ଥିବା କହିଛନ୍ତି କଂଗ୍ରେସ ନେତା ପଞ୍ଚାନନ କାନୁନଗୋ ।
ନାର୍କୋ ଟେଷ୍ଟ ପାଇଁ ଗୁଜୁରାଟ ଯିବ ଗୋପାଳ: ମନ୍ତ୍ରୀ ନବ ଦାସ ହତ୍ୟାକାଣ୍ଡ ଘଟଣାରେ କ୍ରାଇମବ୍ରାଞ୍ଚ ତଦନ୍ତକୁ ଜୋରଦାର କରିଛି । ବୁଧବାର ଅଭିଯୁକ୍ତ ଗୋପାଳର ଦ୍ବିତୀୟ ପର୍ଯ୍ୟାୟ ରିମାଣ୍ଡ ଅବଧି ଶେଷ ହୋଇଥିବା ବେଳେ ମଙ୍ଗଳବାର ଘଟଣାସ୍ଥଳକୁ ନେଇ କ୍ରାଇମ ସିନ୍ ରିକ୍ରିଏସନ କରିଥିଲା କ୍ରାଇମବ୍ରାଞ୍ଚ । ଏହାପରେ ଘଟଣାରେ ତଦନ୍ତର ତଦାରଖ କରିବା ଦାୟିତ୍ବରେ ଥିବା ହାଇକୋର୍ଟ ଅବସରପ୍ରାପ୍ତ ବିଚାରପତି ଜଷ୍ଟିସ ଜେପି ଦାସ ଝାରସୁଗୁଡ଼ାରେ ପହଞ୍ଚିଥିଲେ । ତାଙ୍କ ସହ ପୋଲିସ ଡିଜି, ଆଇନ ଶୃଙ୍ଖଳା ଏଡିଜି ଓ ଗୁଇନ୍ଦା ନିର୍ଦ୍ଦେଶକ ମଧ୍ୟ ଝାରସୁଗୁଡ଼ା ଆସିଥିଲେ । ବୁଧବାର ସକାଳୁ ଜଷ୍ଟିସ ଦାସଙ୍କ ସହ ପୋଲିସ ଡିଜି ସୁନୀଲ ବଂଶଲ ଘଟଣାସ୍ଥଳକୁ ଯାଇ ଅନୁଧ୍ୟାନ କରିବା ପରେ ଭୁବନେଶ୍ବର ଫେରିଛନ୍ତି । ସେପଟେ ଗୋପାଳକୁ ତୃତୀୟ ଥର ପାଇଁ ୫ ଦିନିଆ ରିମାଣ୍ଡରେ ନେଇଛି କ୍ରାଇମବ୍ରାଞ୍ଚ । ଏହି ଅବଧି ସମୟରେ ତାର ନାର୍କୋ ଟେଷ୍ଟ ପାଇଁ ତାକୁ ଗୁଜୁରାଟ ନିଆଯିବ ବୋଲି ସୂଚନା ମିଳିଛି ।