ଖୋର୍ଦ୍ଧା: ବେଗୁନିଆ ନିର୍ବାଚନମଣ୍ଡଳୀ ପାଇଁ କଂଗ୍ରେସ ପକ୍ଷରୁ ନୂଆ ପ୍ରାର୍ଥୀ ଘୋଷଣା ହୋଇଛି । ପୂର୍ବରୁ ପୃଥ୍ବୀବଲ୍ଲଭ ପଟ୍ଟନାୟକ ପ୍ରାର୍ଥୀ ଥିବାବେଳେ ସେ ଲଢିବା ପାଇଁ ମନା କରିଦେଇଥିଲେ । ଫଳରେ ନୂଆ ପ୍ରାର୍ଥୀ ଭାବେ ପ୍ରଦୀପ କୁମାର ସାହୁଙ୍କୁ ପ୍ରାର୍ଥୀ ଘୋଷଣା କରାଯାଇଛି ।
ଭିଡିଓ ସୌଜନ୍ୟ: ପ୍ରତିନିଧି, ଖୋର୍ଦ୍ଧା ପୂର୍ବତନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକଙ୍କ ପୁଅ ପୃଥ୍ବୀବଲ୍ଲଭଙ୍କୁ ଦଳୀୟ ଟିକେଟ ମିଳିଥିଲା । ହେଲେ ସେ ନିର୍ବାଚନ ଲଢିବାକୁ ମନା କରିବା ଫଳରେ ଆଜି ସନ୍ଧ୍ୟାରେ କଂଗ୍ରେସ ପକ୍ଷରୁ ନୂତନ ପ୍ରାର୍ଥୀ ତାଲିକା ପ୍ରକାଶ ପାଇଛି । ପୂର୍ବରୁ ଆମ ଓଡିଶା ପାଇଁ ପ୍ରଦୀପ ପ୍ରାର୍ଥୀ ହୋଇଥିଲେ ।
ଏହି ନିର୍ବାଚନମଣ୍ଡଳୀର ପ୍ରଦୀପଙ୍କର ଭଲ ସଙ୍ଗଠନ ଥିବାବେଳେ ଦଳ ତାଙ୍କୁ ପ୍ରାର୍ଥୀ କରିଥିବାରୁ ସେ ସେଠାରୁ ବିଜୟୀ ହେବେ ବୋଲି ଦଳ ଆଶା ମଧ୍ୟ ରଖିଛି । ତେବେ କଂଗ୍ରେସରୁ ପ୍ରାର୍ଥୀ ହୋଇଥିବା ପ୍ରଦୀପ ଗତ ନିର୍ବାଚନରେ ପ୍ରାୟ 34 ହଜାର ଭୋଟ ପାଇ ଦ୍ବିତୀୟ ସ୍ଥାନରେ ଥିଲେ । ସେହିପରି ଗତଥର କଂଗ୍ରେସ ପ୍ରାର୍ଥୀ ଦେବାଶିଷ ପଟ୍ଟନାୟକ ପାଖାପାଖି 20 ହଜାର ଭୋଟ ପାଇଥିବାରୁ ଏଠାରେ ଦଳ ଦୁଇ ଭାଗ ହୋଇଯାଇଥିଲା ।
ମୋଟାମୋଟି ଭାବରେ ଦେଖିବାକୁ ଗଲେ କଂଗ୍ରେସର ଏହି ନିର୍ବାଚନମଣ୍ଡଳୀରେ ପ୍ରାୟ 50ରୁ 60 ହଜାର ଭୋଟ ଅଦ୍ୟାବଧି ରହିଛି । ଏହାକୁ ପାଥେୟ କରି ପ୍ରଦୀପ ଆଗକୁ ଯିବେ ବୋଲି କୁହାଯାଉଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
