ଭୁବନେଶ୍ବର: ଆଜିଠାରୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରହିବ ୟୁନିଟ-୨ ସ୍ଥିତ ମାର୍କେଟ ବିଲ୍ଡିଂ । ମାର୍କେଟ ବିଲ୍ଡିଂର ବାହାରେ ତାଲା ଆଉ ଭିତରେ ଦୋକାନରେ ବି ତାଲା। ରାଜ୍ୟ ରାଜ୍ୟଧାନୀ ଭୁବନେଶ୍ୱରର ସବୁଠାରୁ ବଡ ଓ ଖୋଲା ବଜାର ମାର୍କେଟ ବିଲ୍ଡିଂ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ବନ୍ଦ ରହିବି । ଏଠାରେ ବ୍ୟବସାୟ କରୁଥିବା ସ୍ଥାୟୀ ଅସ୍ଥାୟୀ ଦୋକାନୀଙ୍କ ମଧ୍ୟରେ ଥିବା ବିବାଦ ତୁଟୁ ନ ଥିବାବେଳେ ସ୍ଥାୟୀ ଦୋକାନୀଙ୍କ ଦ୍ୱାରା ବନ୍ଦ ହେଲା ମାର୍କେଟ । ଯେପର୍ଯ୍ୟନ୍ତ ଉଠାଦୋକାନୀ ନଉଠିବେ ବା ବିଏମସିର ହସ୍ତକ୍ଷେପରେ ଏହାର କୌଣସି ସମାଧାନ ନହେବ, ସେପର୍ଯ୍ୟନ୍ତ ଧାରଣାରୁ ଉଠିବେ ନାହିଁ ବୋଲି ସେଣ୍ଟ୍ରାଲ୍ ମାର୍କେଟ ଆସୋସିଏସନ କହିଛି ।
ସ୍ଥାୟୀ, ଅସ୍ଥାୟୀ ଦୋକାନୀଙ୍କ ମଧ୍ୟରେ ଥିବା ବିବାଦ ତୁଟୁ ନଥିବାବେଳେ ବିଏମ୍ସି କୌଣସି ଦୃଢ଼ ପଦକ୍ଷେପ ନେଉନାହିଁ । ଫଳରେ ମାର୍କେଟ ବିଲ୍ଡିଂ ଭିତରେ ଏବେ ଉଠାଦୋକାନୀମାନେ ଏକ ପ୍ରକାର କବ୍ଜା କରି ସାରଲେଣି । ଉଠା ଦୋକାନୀଙ୍କ ହାତରେ ହାଇକୋର୍ଟଙ୍କ ରହିତାଦେଶ ଅଛି । ଭୁବନେଶ୍ୱର ମହାନଗର ନିଗମ ଦେଇଥିବା ଟ୍ରେଡ୍ ଲାଇସେନ୍ସ, ବାର୍ଷିକ ଅର୍ଥ ପୈଠର ରସିଦ, ତା' ସହିତ ପୂର୍ବତନ ମେୟର ଓ କମିଶନର ଦେଇଥିବା ଅଗ୍ରାଧିକାର ଭିତ୍ତିକ ପ୍ରମାଣ ପତ୍ର ମଧ୍ୟ ରହିଛି । ତେଣୁ କାହିଁକି ସେମାନେ ମାର୍କେଟ ବିଲ୍ଡିଂରୁ ହଟିବେ ବୋଲି ପ୍ରଶ୍ନ କରିଛନ୍ତି । ସେଥିପାଇଁ ମାର୍କେଟ ବିଲ୍ଡିଂ ପରିସରରେ ଏମାନେ ପ୍ରତିବାଦ କରିଛନ୍ତି । ଏଠାରେ ଥିବା ଉଠାଦୋକାନୀ ବର୍ଷବର୍ଷ ଧରି ବ୍ୟବସାୟ କରି ପେଟ ପୋଷୁଥିବା ବେଳେ ଏଠାରୁ ଉଠିବାକୁ ଅରାଜି ହୋଇଛନ୍ତି ।
ଅନ୍ୟପଟେ ମାର୍କେଟ ବିଲ୍ଡିଂ ଗେଟ୍ ଆଗରେ ପ୍ରତିବାଦ କରିଛନ୍ତି ସ୍ଥାୟୀ ଦୋକାନୀ ସଂଘ । ସେଣ୍ଟ୍ରାଲ ମର୍କେଟ ବ୍ୟସାୟୀ ସଂଘ ମାର୍କେଟ ପରିସରକୁ ସୁନ୍ଦର, ଚିକ୍କଣ ଓ ସାଜସଜ୍ଜା କରୁଛି । ଉଠା ଦୋକାନୀ ଅଳିଆ କରୁଥିବାରୁ ତାଙ୍କୁ ଏଠାରୁ ହଟାଯାଉ । କେବଳ ସେତିକି ନୁହେଁ ପୂର୍ବରୁ ଉଠା ଦୋକାନୀଙ୍କୁ ହଟା ଯାଇଥିବା ବେଳେ ପୁଣି ତାଙ୍କୁ ବସିବାକୁ କିଏ ଅନୁମତି ଦେଲେ ବୋଲି ସ୍ଥାୟୀ ବ୍ୟବସାୟୀ ପ୍ରଶ୍ନ କରିଛନ୍ତି । ସମସ୍ୟା ସମାଧାନ ଲାଗି ସେଣ୍ଟ୍ରାଲ୍ ମାର୍କେଟ ବ୍ୟବସାୟୀ ସଂଘ ପକ୍ଷରୁ ବିଏମ୍ସିକୁ ତିନି ଦିନ ସମୟ ଦିଆଯାଇଥିଲା । କିନ୍ତୁ ପ୍ରତିଶ୍ରୁତି ମୁତାବକ, ଉଠାଦୋକାନୀମାନଙ୍କୁ ବିଏମସି ଉଠାଇ ପାରିନଥିବାରୁ ଆଜିଠୁ ମାର୍କେଟ ବିଲ୍ଡିଂ ବନ୍ଦ ରଖିଛି ବ୍ୟବସାୟୀ ସଂଘ । ସସସ୍ୟାର ସମାଧାନ ନହେବା ପର୍ଯ୍ୟନ୍ତ ୩ ଦିନ ଧରି ମାର୍କେଟ ବନ୍ଦ ରହିବ ବୋଲି ସଂଘ ପକ୍ଷରୁ କୁହାଯାଇଛି । ମାର୍କେଟ ବିଲ୍ଡିଂର ୧୬୫ ବ୍ୟବସାୟୀ ଧାରଣାରେ ବସିବା ସହ ମାର୍କେଟ ବନ୍ଦ ରଖିଛନ୍ତି । ଅନ୍ୟ ପଟେ ଅସ୍ଥାୟୀ ବ୍ୟବସାୟୀ ମାନେ ହାଇକୋର୍ଟର ଅର୍ଡର ଦେଖାଇବା ସହ ସେଠି ବସି ବ୍ୟବସାୟ କରିବା ପାଇଁ ଜିଦ ଧରି ବସିଛନ୍ତି । ସେମାନଙ୍କୁ ଦୋକାନ କରିବା ପାଇଁ ବିଏମ୍ସି ସ୍ୱତନ୍ତ୍ର ସ୍ଥାନ ପ୍ରଦାନ ପାଇଁ ସେମାନେ ଦାବି କରିଛନ୍ତି ।