ଖୋର୍ଦ୍ଧା:ଫୁଟିଲା ଅଣ୍ଡା, ବାହାରିଲେ ଅଜଗର । ଖୋର୍ଦ୍ଧା ମଲିପୁର ଗ୍ରାମପଞ୍ଚାୟତ ଗନିଆଳ ଗ୍ରାମ ଜଙ୍ଗଲରୁ ଉଦ୍ଧାର ହୋଇଥିବା ଅଜଗର ଅଣ୍ଡାରୁ ଫୁଟିଲେ ଛୁଆ । ଅଜଗର ଦେଇଥିବା 30ଟି ଅଣ୍ଡାରୁ 28ଟି ଅଣ୍ଡାରୁ ଛୁଆ ଫୁଟିଥିବା ସୂଚନା ଦେଇଛନ୍ତି ହଳଦିଆ ରେଞ୍ଜର ।
ଗତ ମେ ମାସ 5 ତାରିଖରେ ଏକ ମାଈ ଅଜଗର ସାପ ଗାତ ଭିତରେ ଥିବା ମଲିପୁର ଗ୍ରାମବାସୀ ଦେଖି ବନ ବିଭାଗକୁ ଖବର ଦେଇଥିଲେ । ବନ କର୍ମଚାରୀ ସେଠାରେ ସାପକୁ ଗାତରେ ଦେଖିବା ସହିତ ସାପ ଅଣ୍ଡା ଦେଇଥିବା ଜଣାପଡିଥିଲା । ଗ୍ରାମବାସୀ ଓ ବନ୍ୟପ୍ରାଣୀ ବିଭାଗ ସାପକୁ ସୁରକ୍ଷା ଦେବା ସହିତ ତାର ଗତିବିଧି ଉପରେ ନଜର ରଖିଥିଲେ । ହେଲେ 21 ତାରିଖ ଶୁକ୍ରବାର ଦିନ ସାପ ଗାତରୁ ବାହାରି ଅଣ୍ଡା ପାଖକୁ ନ ଫେରିବାରୁ ବନ୍ୟପ୍ରାଣୀ ବିଭାଗ ଓ ସ୍ନେକ ହେଲ୍ପ ଲାଇନ ସଦସ୍ୟ ସାପ ଅଣ୍ଡାକୁ ପ୍ରଥମେ ନିକଟସ୍ଥ ସ୍କୁଲ ଘରେ ଓ ପରେ ମିନଚୀନପାଟଣା ରେଞ୍ଜ ଅଫିସରେ ସୁରକ୍ଷିତ ରଖାଯାଇଥିଲା । ଅଜଗର ଦେଇଥିବା 30 ଅଣ୍ଡାରୁ ଦୁଇଟି ନଷ୍ଟ ହୋଇଯାଇଥିବାବେଳେ ଆଜି 28ଟି ଅଣ୍ଡାରୁ ଅଜଗର ଛୁଆ ଫୁଟିଥିବା ଦେଖାଦେଇଛି । ସେହିପରି ସମସ୍ତ ଅଜଗର ଛୁଆ ସୁସ୍ଥ ଥିବା ହଳଦିଆ ବନ୍ୟପ୍ରାଣୀ ରେଞ୍ଜର କହିଛନ୍ତି ।