ଆନନ୍ଦପୁର: ଜମିବାଡି ବିବାଦକୁ ନେଇ ମହିଳାଙ୍କୁ ଆକ୍ରମଣ । ଆକ୍ରମଣର ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହୋଇଛି । ଗୁରୁତର ଅବସ୍ଥାରେ ମହିଳାଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି । ଏଭଳି ଅଭିଯୋଗ ଆସିଛି କେନ୍ଦୁଝର ଜିଲ୍ଲାର ଅଂରା ଗାଁରୁ ।
ଗାଁର ନାରାୟଣ ପରିଡା ଏକ ସରକାରୀ ଜାଗାକୁ ଦୀର୍ଘ ୨୦ ବର୍ଷ ହେବ ଦଖଲ କରି ଚଳୁଛନ୍ତି । କିନ୍ତୁ କିଛି ବ୍ୟକ୍ତି ଏହାକୁ ବିରୋଧ କରିଥିଲେ । ପରେ ନାରାୟଣ ପରିଡାଙ୍କ ସହ ଝଗଡା କରିଥିଲେ । ଏପରିକି ନାରାୟଣଙ୍କୁ ଏକଘରିଆ ମଧ୍ୟ କରିଦେଇଥିଲେ । ଏନେଇ ତାଙ୍କ ପତ୍ନୀ ଦମୟନ୍ତୀ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପରେ ଅଭିଯୁକ୍ତଙ୍କୁ ନୋଟିସ କରାଯାଇ ଥାନାକୁ ଡକରା ହୋଇଥିଲା । ଏପରିକି, ଦମୟନ୍ତୀ ଥାନାରୁ ଫେରିବା ପରେ ଆକ୍ରମଣ କରାଯାଇଥିବା ଅଭିଯୋଗ ହୋଇଛି । ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ଆନନ୍ଦପୁରରୁ ସ୍ମୃତି ରଞ୍ଜନ ବିହାରୀ, ଇଟିଭି ଭାରତ
