କେନ୍ଦୁଝର: ପୁଣି ରାଜ୍ୟର 2019 ନିର୍ବାଚନ ରଣାଙ୍ଗନରେ ବିଜେପିର ସେନାପତି ଅମିତ ଶାହା । କେନ୍ଦୁଝରର ମେଡିକାଲ କଲେଜ ପଡିଆରେ ଆୟୋଜିତ ହୋଇଥିବା ଦଳୀୟ କାର୍ଯ୍ୟକ୍ରମକୁ ସମ୍ବୋଧିତ କରିବା ଅବସରରେ ସେ ଉଭୟ ବିଜେଡି ଏବଂ କଂଗ୍ରେସକୁ ଟାର୍ଗେଟ କରିଛନ୍ତି ।
ଦଳୀୟ କର୍ମକର୍ତ୍ତାଙ୍କୁ ସମ୍ବୋଧନ କରିବା ଅବସରରେ ଶାହା କହିଛନ୍ତି ଯେ ନିର୍ବାଚନ ପ୍ରଚାର ପାଇଁ ସେ ସମଗ୍ର ଦେଶ ବୁଲି ସାରିଲେଣି । ମାତ୍ର ସବୁସ୍ଥାନରେ ତାଙ୍କୁ କେବଳ ମୋଦି ମୋଦି ହିଁ ଶୁଣିବାକୁ ମିଳୁଛି । ଅର୍ଥାତ ଦେଶବାସୀ ପୁଣିଥରେ ନରେନ୍ଦ୍ର ମୋଦିଙ୍କୁ ପ୍ରଧାନମନ୍ତ୍ରୀ ଭାବେ ଦେଖିବାକୁ ଚାହୁଁଛନ୍ତି।
ବିକାଶ ପ୍ରସଙ୍ଗରେ ବିଜେଡି ସରକାରକୁ ଟାର୍ଗେଟ କରିଛନ୍ତି ଶାହା । ଏନେଇ ସେ କହିଛନ୍ତି 19 ବର୍ଷ ବର୍ଷ ଧରି କ୍ଷମତାରେ ରହିବା ପରେ ମଧ୍ୟ ରାଜ୍ୟର ବିକାଶ ହୋଇ ପାରିନାହିଁ । ପ୍ରାକୃତିକ ସମ୍ପଦରେ ଭରପୂର ଥିବା ଓଡିଶା ଆଜି ଗରିବ କାହିଁକି ବୋଲି ଜବାବ ମାଗିଛନ୍ତି । କେନ୍ଦୁଝର ମେଡିକାଲ କଲେଜର ନିର୍ମାଣ ପାଇଁ କେନ୍ଦ୍ର ସରକାର ଅର୍ଥ ଯୋଗାଉଛନ୍ତି । ଡିଷ୍ଟ୍ରିକ ମିନେରାଲ ଫଣ୍ଡ ମାଧ୍ୟମରେ ଜିଲ୍ଲାକୁ 1600 କୋଟି ମିଳିଛି । ତଥାପି ଏହାର ଉପଯୁକ୍ତ ବିନିଯୋଗ ହୋଇ ପାରିନଥିବା ସେ ଦର୍ଶାଇଛନ୍ତି ।
ଏହି ସାମବେଶରେ ଲୋକସଭା ପ୍ରାର୍ଥୀ ଅନନ୍ତ ନାଏକଙ୍କ ସହ ସାତଟି ବିଧାନସଭା ପ୍ରାର୍ଥୀ ମଞ୍ଚରେ ଉପସ୍ଥିତ ଥିଲେ । ତେବେ ଶାହାଙ୍କ ଭାଷଣ ପରେ କର୍ମୀଙ୍କ ମହଲରେ ଉତ୍ସାହର ମାହୋଲ ଖେଳିଯାଇଥିବା ଦେଖିବାକୁ ମିଳିଛି ।
କେନ୍ଦୁଝରରୁ ସ୍ମୃତିରଞ୍ଜନ ବିହାରୀଙ୍କ ସହ ସନ୍ତୋଷ ମହାପାତ୍ର, ଇଟିଭି ଭାରତ