ଲୁହାପଥର ଚୋରା ଚାଲାଣ ବେଳେ ଟ୍ରକ ଜବତ, 6 ଗିରଫ

ଲୁହା ପଥର ଚୋରା ଚାଲାଣ ଘଟଣାରେ 6 ଜଣ ଅଭିଯୁକ୍ତଙ୍କୁ ଗିରଫ କରବା ସହ ଦୁଇଟି ଟ୍ରକ ଜବତ କରିଛି ରୁଗୁଡି ପୋଲିସ ।

କେନ୍ଦୁଝର: ଲୁହା ପଥର ଚୋରା ଚାଲାଣ ହେଉଥିବାବେଳେ ରୁଗୁଡି ପୋଲିସ ଜବତ କରିଛି ଟ୍ରକ । ଏହି ଘଟଣାରେ ଜଡିତ 6 ଜଣ ଅଭିଯୁକ୍ତଙ୍କୁ ଗିରଫ କରିବା ସହ କୋର୍ଟ ଚାଲାଣ ହୋଇଛନ୍ତି । ବଡ଼ବିଲ ତହସିଲ ଶଙ୍ଖଝର ଗାଁରେ ବନ୍ଦ ପଡ଼ିଥିବା ଏକ କ୍ରସର ପ୍ଲାଣ୍ଟରୁ ୨୬ ଟନ୍ ସାଇଜ୍ ଲୁହାପଥର ହାଇଭା ଟ୍ରକ ନଂ - ଜେଏଚ୍ ୦୫ ଏଡବ୍ଲୁ ୦୩୨୦ ରେ ଲୋଡ୍ କରାଯାଇ ଚୋରା ଚାଲାଣ ହେଉଥିବା ବିଶ୍ବସ୍ତ ସୁତ୍ରରୁ ଖବର ପାଇ ଚଢ଼ାଉ କରିଥିଲା ବଡ଼ବିଲ ପୋଲିସ । ଟଂଟୋ ସ୍ଥିତ ବିଆରପିଏଲ୍ ନିକଟରୁ ଏହି ହାଇୱା ଟ୍ରକକୁ ଜବତ୍ କରିବା ସହ ସଂପୃକ୍ତ ୪ ଜଣ ଅଭିଯୁକ୍ତଙ୍କୁ ଗିରଫ୍ କରିବାରେ ସଫଳ ହୋଇଥିଲା ପୋଲିସ ।

ଏମାନେ ହେଲେ ଯୋଡ଼ା ଅଂଚଳର ୨ ମାଫିଆ ସମ୍ଭୁ ବାହାଦୁର, ରାଜେଶ ମୁଣ୍ଡା, ଝାଡ଼ଖଣ୍ଡର ହାଇଭା ଡ୍ରାଇଭର ଲକ୍ଷ୍ମଣ ମାହତୋ ଓ ହେଲପର ବିକାଶ ମାହତୋ । ତେବେ ଗିରଫ ଅଭିଯୁକ୍ତଙ୍କୁ ପଚରା ଉଚୁରା ପରେ ଚୋରା କାରବାରର ମୁଖ୍ୟ ମାଫିଆ ସମ୍ପଦ କୁମାର କାଳନ୍ଦୀ ଓ ହାଇୱା ମାଲିକ ଉମେଶ କୁମାର ପାଠକକୁ ଝାଡ଼ଖଣ୍ଡରୁ ଗିରଫ୍ କରିଥିବା ବଡ଼ବିଲ ପୋଲିସ ସୂଚନା ଦେଇଛି ।

ଘଟଣାରେ ଗୋଟିଏ 12 ଚକିଆ ଓ ଗୋଟିଏ 10 ଚକିଆ ଟ୍ରକ ଜବତ ହୋଇଛି । ଅଭିଯୁକ୍ତଙ୍କ ନିକଟରୁ 15, 600 ତାଙ୍କ ଓ 3 ମୋବାଇଲ ଜବତ ହୋଇଛି । ଜବତ୍ ଲୁହାପଥରର ଆନୁମାନିକ ବଜାର ଦର ପ୍ରାୟ ୨ ଲକ୍ଷ ଟଙ୍କା ହେବ ବୋଲି ଅନୁମାନ କରାଯାଉଛି । ଗିରଫ୍ ସମସ୍ତ ୬ ଅଭିଯୁକ୍ତଙ୍କୁ ଆଜି କୋର୍ଟ ଚାଲାଣ କରାଯାଇଛି ।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ