କେନ୍ଦୁଝର ମୁଖ୍ୟ ଚିକିତ୍ସାଳୟରେ ଦୁଇ ମୃତ, ଘଟଣାସ୍ଥଳରେ ଉତ୍ତେଜନା

ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସା ଅବହେଳାରୁ ଦୁଇ ମୃତ ଅଭିଯୋଗ । ଚିକିତ୍ସାଳୟରେ ଉତ୍ତେଜନା ।

କେନ୍ଦୁଝର: ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସା ଅବହେଳାରୁ ଦୁଇ ମୃତ ଅଭିଯୋଗ । ଚିକିତ୍ସାଳୟରେ ଉତ୍ତେଜନା ।

ଗତକାଲି(ସୋମବାର) ରାତିରେ ସହର ଉପକଣ୍ଠ ନରଣପୁରର ଖିରୋଦିନି ପାତ୍ର ରକ୍ତଚାପର ଶିକାର ହୋଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ । ରାତିରେ ତାଙ୍କୁ ଡାକ୍ତର ଦେଖିବା ପରେ ସାଲାଇନ ଦେଇଥିଲେ । ଯେଉଁଥିପାଇଁ ରୋଗୀଙ୍କ ସମ୍ପର୍କୀୟଙ୍କୁ ପଇସା ଦେବାକୁ ପଡିଥିଲା । ହେଲେ ଆଜି ଭୋରରୁ ରୋଗୀଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଅମ୍ଳଜାନ ଦେବାକୁ ଡାକ୍ତର କହିଥିଲେ । ହେଲେ ମହିଳା ବିଭାଗରେ ଯେଉଁ 3 ଟି ଅମ୍ଳଜାନ ଥିଲା ସେଥିରୁ ଗୋଟିଏ ଜଣେ ସାପ କାମୁଡା ରୋଗୀଙ୍କ ଦେହରେ ଲାଗିଥିଲା ଓ ଅନ୍ୟ ଦୁଇଟି ଖାଲିଥିଲା । ହେଲେ ଏହାକୁ ରୋଗୀଙ୍କୁ ଲଗାଇବା ଲାଗି କେହି ଉପସ୍ଥିତ ନଥିଲେ । ସେପଟେ ଡାକ୍ତର ମଧ୍ୟ ଆଉ ଆସିନଥିବା ଅଭିଯୋଗ କରିଛନ୍ତି ପରିବାର ଲୋକେ । ଫଳରେ ତାଙ୍କର ମୃତ୍ୟୁ ହୋଇଥିଲା ।

ସେହିପରି ମୟୁରଭଞ୍ଜ କରଞ୍ଜିଆ ନୂଆଁ ଗାଁର ଜାନକୀ ପାତ୍ରଙ୍କୁ ଗତକାଲି ସାପ କାମୁଡିଥିଲା । ସେ ରାତିରେ ସେଠାରୁ ସ୍ଥାନାନ୍ତର ହୋଇ କେନ୍ଦୁଝର ମୁଖ୍ୟ ଚିକିତ୍ସାଳୟକୁ ଆସିଥିଲେ । ତେବେ ମୁଖ୍ୟ ଚିକିତ୍ସାଳୟରେ ତାଙ୍କୁ ଉପଯୁକ୍ତ ଚିକିତ୍ସା ହୋଇନଥିବାରୁ ତାଙ୍କର ମୃତ୍ୟୁ ହୋଇଥିବା ଅଭିଯୋଗ ହୋଇଛି ।

ସେପଟେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଏ ବିଷୟରେ ଅବଗତ ହେବା ପରେ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ