ଆନନ୍ଦପୁର: ଗାଡି ସଜାଡିବାରେ ବିଳମ୍ବ ହେବାରୁ ଟ୍ରକରେ ଦୋକାନକୁ ବାନ୍ଧି ଦୀର୍ଘ 4କିଲୋମିଟର ଘୋଷାରି ନେଲେ ଡ୍ରାଇଭର। ଏପରି ଅଭାବନୀୟ ଘଟଣା ଘଟିଛି କେନ୍ଦୁଝର ଜିଲ୍ଲା ରାମଚନ୍ଦ୍ରପୁର ଥାନା ଅଞ୍ଚଳରେ ।
ଖଲଣା ପେଟ୍ରୋଲ ଟାଙ୍କି ଛକ ନିକଟରେ ଥିବା ଏକ ଗ୍ୟାରେଜକୁ ଟ୍ରକ ପଛରେ ବାନ୍ଧି ଘୋଷାରି ନେଇଛନ୍ତି ଡ୍ରାଇଭର। ଏହି ଘଟଣାର ଭିଡିଓ ଏବେ ଭାଇରାଲ ହେବା ପରେ ଏନେଇ ରାମଚନ୍ଦ୍ରପୁର ଥାନାରେ ଏତଲା ଦେଇଛନ୍ତି ଗ୍ୟାରେଜ ମାଲିକ ।
ସୂଚନା ଅନୁଯାୟୀ, ପଣ୍ଡୁଆର ଆଜାରୁଦ୍ଧିନ ଖାଁ ଖଲଣା ପେଟ୍ରୋଲ ଟାଙ୍କି ଛକ ନିକଟରେ ଏକ କ୍ୟାବିନ ପକାଇ ମେକାନିକ କାର୍ଯ୍ୟ କରୁଛନ୍ତି । ବଡପଦନାର ବିଜୟ କୁମାର ସାହୁ ନିଜ ଟ୍ରକର ମରାମତି ଆଜାରୁଦ୍ଦିନଙ୍କ ନିକଟରେ କରାଇଥିଲେ ।
ପୁନର୍ବାର ତାଙ୍କ ଟ୍ରକ୍ ଖରାପ ହେବାରୁ ସେ ଆଜାରୁଦ୍ଦିନଙ୍କୁ କହିଥିଲେ । ହେଲେ,ଆଜାରୁଦ୍ଦିନ୍ ଦୋକାନ ନଖୋଲିବାରୁ ସେ ରାଗିଯାଇ କ୍ୟାବିନକୁ ଟ୍ରକ୍ ପଛରେ ବାନ୍ଧି 20ନମ୍ବର ଜାତୀୟ ରାଜପଥରେ ଦୀର୍ଘ 4କିଲୋମିଟର ଘୋଷାରି ନେଇ ବଡପଦନା ଛକ ରାସ୍ତାରେ ଫୋପାଡି ଦେଇଥିଲେ । ଆଜାରୁଦ୍ଦିନ ଏହା ଜାଣିବା ପରେ ରାମଚନ୍ଦ୍ରପୁର ଥାନାରେ ଏକ ଏତଲା ଦାୟର କରିଛନ୍ତି ।
ଆନନ୍ଦପୁରରରୁ ସ୍ମୃତିରଞ୍ଜନ ବିହାରୀ, ଇଟିଭି ଭାରତ