କେନ୍ଦୁଝର: ପ୍ରଥମେ ସ୍ବାମୀ ଆଉ ଏବେ ଏକ ମାତ୍ର ରୋଜଗାର ପୁଅକୁ ହରାଇ ଦୁଃଖରେ ଭାଙ୍ଗିପଡିଛନ୍ତି ତେଲକୋଇ ବ୍ଲକ ଶିଙ୍ଗୁଳାବାହାଳି ଗାଁର ସ୍ବର୍ଗତଃ ଧନେଶ୍ଵର ନାୟକଙ୍କ ପତ୍ନୀ ଚିନା । ସୂଚନାମୁତାବକ, ୨ ବର୍ଷ ତଳେ ପୁଅ ମନୋଜ ନାୟକ ଦାଦନ ଖଟିବାକୁ କର୍ଣ୍ଣାଟକର ବେଙ୍ଗାଲୁରୁ ଯାଇଥିଲା । ହେଲେ ୨ ଦିନ ପୂର୍ବେ ପୁଅ ମନୋଜର ମୃତ୍ୟୁ ହୋଇଥିବା ସମ୍ପର୍କରେ ଫୋନ ଯୋଗେ ଜଣାଇବା ସହ ପୁଅର ମୃତଦେହ ପାଇବାକୁ ହେଲେ ୭୦ ହଜାର ଟଙ୍କା ଦାବି କରାଯାଇଥିଲା । ତେବେ ଏକମାତ୍ର ରୋଜଗାରକ୍ଷମ ପୁଅର ସନ୍ଦେହଜନକ ମୃତ୍ୟୁକୁ ସହଜରେ ଗ୍ରହଣ କରିପାରୁନାହାନ୍ତି ପରିବାର ଲୋକେ । ପୁଅର ମୃତଦେହ ଫେରିପାଇବା ପାଇଁ ୪୦ ହଜାର ଟଙ୍କା ଯୋଗାଡ କରି ପଠାଇଥିଲେ ମାଆ ଚିନା ।
ତେବେ ମୃତଦେହ ହସ୍ତାନ୍ତର ସମୟରେ ଅବଶିଷ୍ଟ ୩୦ ହଜାର ଟଙ୍କା ଦେବାକୁ ପଡିବ ବୋଲି ଦାବି କରିବାରୁ ମାନସିକ ସ୍ତରରେ ସମ୍ପୂର୍ଣ୍ଣ ଭାଙ୍ଗି ପଡିଥିବା ଚିନାଙ୍କୁ ସମାଜସେବୀ ମହାମାୟା ସହଯୋଗର ହାତ ବଢ଼ାଇଛନ୍ତି । ଚିନା ଓ ତାଙ୍କ ପରିବାର ସଦସ୍ୟଙ୍କୁ ସଙ୍ଗରେ ଧରି କେନ୍ଦୁଝରରେ ପହଞ୍ଚି ଜିଲ୍ଲାପାଳଙ୍କୁ ସାକ୍ଷାତ କରି ସହାୟତା ଲୋଡିଥିଲେ । ବହୁ ସମୟ ଧରି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିଳମ୍ବିତ ରାତିରେ ଧାରଣା ଦେଇଥିଲେ । ଜିଲ୍ଲାପାଳ ତୁରନ୍ତ ଜିଲ୍ଲା ଶ୍ରମ ଅଧିକାରୀଙ୍କୁ ଘଟଣାର ତଦନ୍ତ କରି ରିପୋର୍ଟ ପ୍ରଦାନ ସହ ସହାୟତା ଯୋଗାଇ ଦେବାକୁ ନିର୍ଦ୍ଦେଶ ଦେଇଥିଲେ ।