ରେଜିଷ୍ଟର ଅଫିସ ସ୍ଥାନାନ୍ତର ଦାବିରେ ରାସ୍ତାରୋକ

ସବ-ରେଜିଷ୍ଟର ଅଫିସ ସ୍ଥାନାନ୍ତରଣ ଦାବିରେ ରାସ୍ତାରୋକ କରିଛନ୍ତି ଆନନ୍ଦପୁରର ସାଇଁପୁର ଗ୍ରାମବାସୀ । ଘସିପୁରାରୁ ସାଇଁକୁଳ ସ୍ଥାନାନ୍ତର ଦାବିରେ ହୋଇଛି ରାସ୍ତାରୋକ ।

ଆନନ୍ଦପୁର: ସବ-ରେଜିଷ୍ଟର ଅଫିସକୁ ସ୍ଥାନାନ୍ତରଣ ଦାବିରେ 20 ନଂ ଜାତୀୟ ରାଜପଥକୁ ଅବରୋଧ କରାଯାଇଛି । ସବ-ରେଜିଷ୍ଟ୍ରେସନ ଅଫିସକୁ ଘସିପୁରାରୁ ସାଇଁକୁଳ ସ୍ଥାନାନ୍ତର ପାଇଁ ବହୁ ଦିନରୁ ଦାବି ହୋଇଆସୁଥିଲେ ମାତ୍ର ଏହାକୁ ସ୍ଥାନାନ୍ତର କରାଯାଇନାହିଁ ।

ସ୍ଥାନୀୟ ବାସିନ୍ଦାଙ୍କ କହିବାନୁସାରେ, ସରକାରଙ୍କ ଅନୁମତି ଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ । 2009 ମସିହାରୁ ଘସିପୁରାରେ ନୂଆ ରେଜିଷ୍ଟର ଅଫିସ ତିଆରି ହୋଇଥିଲେ ମାତ୍ର ଏହାକୁ ସ୍ଥାନାନ୍ତର କରାଯାଇନାହିଁ । ତେବେ ସମସ୍ତ ଚେଷ୍ଟା ପରେ ବାଧ୍ୟ ହୋଇ ଗ୍ରାମବାସୀମାନେ ରାସ୍ତାରୋକ କରିଛନ୍ତି ।

ଘଟଣାସ୍ଥଳରେ ତହସିଲଦାର ଓ ସବ-ରେଜିଷ୍ଟାର ଅଫିସର ପହଞ୍ଚି ଆନ୍ଦୋଳନକାରୀଙ୍କୁ ବୁଝାସୁଝା କରିଥିଲେ ମାତ୍ର ଆନ୍ଦୋଳନ ପ୍ରତ୍ୟାହୃତ ହୋଇନଥିଲା । ତେବେ ଶାନ୍ତି ଶୃଙ୍ଖଳା ରକ୍ଷା ପାଇଁ ରାମଚନ୍ଦ୍ରପୁର ପୋଲିସ ଘଟଣାସ୍ଥଳରେ ଉପସ୍ଥିତ ଅଛନ୍ତି ।

ଦାବି ପୂରଣ ନହେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ଆନ୍ଦୋଳନକାରୀମାନେ ଜିଦ ଧରି ବସିଛନ୍ତି ।

ଆନନ୍ଦପୁରର ସ୍ମୃତିରଞ୍ଜନ ବିହାରି, ଇଟିଭି ଭାରତ