ଆନନ୍ଦପୁର: ନାମାଙ୍କନ ଦାଖଲ ବେଳେ ସମସ୍ତ ଦଳର ପ୍ରାର୍ଥୀ ନିଜ ନିଜ ଶକ୍ତି ପ୍ରଦର୍ଶନ କରୁଛନ୍ତି । ଏହି ପରିପ୍ରେକ୍ଷୀରେ ମଙ୍ଗଳବାର ଆନନ୍ଦପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟ ପାଲଟିଥିଲା ଜନସମୁଦ୍ର । ଘସିପୁରା ବିଧାନସଭା ନିର୍ବାଚନ ମଣ୍ଡଳୀର 2 ଜଣ ହେବିୱେଟ ନେତାଙ୍କ ସହ ଅନ୍ୟ 2 ଜଣ ପ୍ରାର୍ଥୀ ନାମାଙ୍କନ ଦାଖଲ କରିଛନ୍ତି । ପ୍ରଥମେ ଗଣଶିକ୍ଷା ମନ୍ତ୍ରୀ ବଦ୍ରି ପାତ୍ର ନିଜ ସମର୍ଥକଙ୍କ ସହ ଏକ ବିରାଟ ପଟୁଆରରେ ଆସି ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ପ୍ରାର୍ଥୀପତ୍ର ଦାଖଲ କରିଥିଲେ । ନାମାଙ୍କନ ଦାଖଲ ପରେ ଜିଲ୍ଲାର ବିକାଶ ଦିଗରେ ଆଉ ଏକ ଇନିଂଶ ଆରମ୍ଭ ହେବାକୁ ଯାଉଥିବା କହିଥିଲେ ମନ୍ତ୍ରୀ ପାତ୍ର ।
ଅପରପକ୍ଷେ ପିସିସି ସଭାପତି ନିରଞ୍ଜନ ପଟ୍ଟନାୟକ ଆନନ୍ଦପୁର ଜଗନ୍ନାଥ ମନ୍ଦିରରେ ମହାପ୍ରଭୁଙ୍କୁ ଦର୍ଶନ କରି ନିଜ ସମର୍ଥକଙ୍କ ସହ ଶୋଭାଯାତ୍ରାରେ ଆସି ନାମାଙ୍କନ ଦାଖଲ କରିଥିଲେ । ଏଥିସହ ନିରଞ୍ଜନ ପଟ୍ଟନାୟକ ବଦ୍ରିପାତ୍ରଙ୍କ ଚ୍ୟାଲେଞ୍ଜକୁ ଗ୍ରହଣ କରି ଏଠାରେ ନିର୍ବାଚନ ଲଢୁଥିବାରୁ ତାଙ୍କ ପ୍ରତି ସେ ଦୟା କରିନଥିବା କହିଥିଲେ । ଯଦି ଘସିପୁରା ନିର୍ବାଚନ ମଣ୍ଡଳୀର ଭୋଟରମାନେ ଶାନ୍ତି ଓ ନ୍ୟାୟ ଚାହୁଁଛନ୍ତି ତେବେ ତାଙ୍କୁ ଭୋଟ ଦେଇ ଜୟଯୁକ୍ତ କରିବେ ବୋଲି ସେ କହିଥିଲେ ।