କେନ୍ଦୁଝର: ରାତି ପାହିଲେ ଏଠି ଘାରେ ପାଣି ଚିନ୍ତା । ସକାଳେ ହେଲେ ପାଣି ମୁନ୍ଦାଏ ପାଇଁ ଗରା, ମାଠିଆ ଧରି ବାହାରି ପଡନ୍ତି ମହିଳା । ମାଇଲ ମାଇଲ ବାଟ ଚାଲିଲେ ମିଳେ ଚୁଆ ପାଣି । କେନ୍ଦୁଝର ସଦର ମହକୁମା ଠୁ ମାତ୍ର 7 କିଲୋମିଟର ଦୂରରେ ଅବସ୍ଥିତ ଗୁହାଳଚାଟୁଆ ଗାଁର ବନ୍ଧ ସାହି । ଦୀପ ତଳ ଅନ୍ଧାର ପରି ଏଠାକାର ଲୋକେ ପାଣି ଟୋପାଏ ପାଇଁ ନିଇତି ହେଉଛନ୍ତି ଡହଳ ବିକଳ । କେବଳ ମଣିଷ ନୁହେଁ, ପଶୁପକ୍ଷୀ ମଧ୍ୟ ଏହି ଚୁଆ ଉପରେ ନିର୍ଭରଶୀଳ । ଏ ଦୃଶ୍ୟ ଦେଖିଲେ ମନେହୁଏ, ଲୋକଙ୍କୁ ବିଶୁଦ୍ଧ ଜଳ ଯୋଗାଇବା ପାଇଁ ସରକାରଙ୍କର ସବୁ ପ୍ରକଳ୍ପ ଯେମିତି ଏଠି ଫେଲ୍ ମାରିଛି ।
ଗୁହାଳଚାଟୁଆ ଗାଁର ବନ୍ଧ ସାହି । ଯେଉଁଠି ବସବାସ କରନ୍ତି ପ୍ରାୟ 50 ଟି ପରିବାର । କିଏ ମୂଳ ଲାଗି ଚାଲେ ତା କିଏ ବାଡି ବଗିଚା କରି ଚଳେ । ସରକାର ସ୍ଵଜଳଧର ଯୋଜନା ଆରମ୍ଭ କରିଛନ୍ତି ସତ, ହେଲେ ଏସବୁ ଯୋଜନା ଏମାନଙ୍କ ପାଇଁ ଯେପରି ପାଲଟିଛି ସାତ ସପନ। ପିଇବା ପାଣି ପାଇଁ ଏମାନଙ୍କୁ ଯିବାକୁ ପଡ଼େ ପ୍ରାୟ 1 କିଲୋମିଟର । ଭୋଟ ଆସିଲେ ନେତାଙ୍କ ସୁଅ ଛୁଟେ । ହେଲେ ଭୋଟ ସରିଲା ପରେ କୋଉ ସରପଞ୍ଚ କି ପ୍ରଶାସନିକ ଅଧିକାରୀଙ୍କ ଏଠାରେ ପାଦ ପଡେନି । ଯାହାକୁ ନେଇ କ୍ଷୋଭ ପ୍ରକାଶ କରିଛନ୍ତି ଏଠାକାର ବାସିନ୍ଦା ।