ଆନନ୍ଦପୁର: ଲଡାଉନରେ କାମଧନ୍ଧା ପାଉନଥିବା ଶ୍ରମଜୀବୀଙ୍କ ପାଇଁ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନାରେ ସରକାର ବିପୁଳ ଅନୁଦାନ ଦେଉଛନ୍ତି । ଘସିପୁରା ବ୍ଳକଁରେ କେବଳ ଫଳକ ପୋତି ଆସୁଥିବା ଅନୁଦାନ ହଡପ କରାଯାଉଥିବା ଅଭିଯୋଗ ହେଉଛି । ଏପରିକି କେତେ ଟଙ୍କା ଅଟକଳ ମଧ୍ୟ ଫଳକରେ ଲେଖା ହୋଇନଥିବା ଦେଖିବାକୁ ମିଳିଛି।
ରାସ୍ତା କାମରେ ମହାଦୁର୍ନୀତି
ଘସିପୁରା ବ୍ଲକର କେଶଦୁରାପାଳ ପଞ୍ଚାୟତ ଘୁଷୁରିଆପଦାଠାରୁ ଦୋଛକି ପର୍ଯ୍ୟନ୍ତ ରାସ୍ତାର ଉନ୍ନତୀକରଣ 2020-21 ଆର୍ଥିକ ବର୍ଷରେ ମନରେଗା ଯୋଜନା ଅନୁଦାନ ଆସିଥିଲା । ସୂଚନା ଫଳକରେ ଅନୁଦାନ ରାଶି ସମ୍ପର୍କରେ ଉଲ୍ଲେଖ ନଥିଲେ ମଧ୍ୟ ଏଥିପାଇଁ ଦଶଲକ୍ଷ ଟଙ୍କା ଖର୍ଚ୍ଚ କରାଯାଇଥିବା କୁହାଯାଉଛି । ସ୍ଥାନୀୟ ଲୋକଙ୍କ କହିବା ଅନୁସାରେ, ଦୁଇସପ୍ତାହ ତଳେ ଏହି ରାସ୍ତାରେ କେବଳ କିଛି ମୋରମ୍ ପକା ଯାଇଥିଲା । କିନ୍ତୁ ନିର୍ମାଣ ସମୟରେ ବ୍ଲକର କନିଷ୍ଠ ଯନ୍ତ୍ରୀ କିମ୍ବା କୌଣସି କର୍ମଚାରୀଙ୍କ ଦେଖା ମିଳିନଥିଲା।