ବିଆରପିଏଲ ପ୍ଲାଣ୍ଟରେ ଦୁର୍ଘଟଣା: ଟ୍ରକ କାଚ ପୋଛିବାବେଳେ ଚାପି ହୋଇ ଶ୍ରମିକ ମୃତ

ବଡ଼ବିଲ ସ୍ଥିତ ବିଆରପିଏଲ ପ୍ଲାଣ୍ଟ ପରିସରରେ ଟ୍ରକ ତଳେ ଚାପି ହୋଇ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି । ମୃତ ସୁନୀଲ ସ୍ଥାନୀୟ ଜଣେ ବ୍ୟକ୍ତିଙ୍କ ଟ୍ରକରେ ଖଲାସି ରୂପେ କାର୍ଯ୍ୟ କରୁଥିଲେ ।

କେନ୍ଦୁଝର: ବଡ଼ବିଲ ସ୍ଥିତ ବିଆରପିଏଲ ପ୍ଲାଣ୍ଟ ପରିସରରେ ଟ୍ରକ ତଳେ ଚାପି ହୋଇ ଜଣେ ଯୁବକଙ୍କ ମୃତ୍ୟୁ ହୋଇଛି । ମୃତ ଯୁବକ ଜଣକ ହେଲେ ସୁନୀଲ କୁମାର । ତାଙ୍କ ଘର ଉତ୍ତରପ୍ରଦେଶର ସୋନଗାଓଁରେ ବୋଲି ଜଣାପଡିଛି ।

ସୁନୀଲ ବିଆରପିଏଲ ପ୍ଲାଣ୍ଟ ପରିସରରେ ଟ୍ରକରୁ ମାଲ ଖାଲି କରି ଟ୍ରକର କାଚ ପୋଛୁ ଥିବାବେଳେ ସମ୍ମୁଖରୁ ଆଉ ଏକ ଟ୍ରକ ପଛକୁ ଆସି ତାଙ୍କୁ ଚାପି ଦେଇଥିଲା । ତେବେ ବିଆରପିଏଲ ପ୍ଲାଣ୍ଟ କର୍ତ୍ତୃପକ୍ଷଙ୍କ ଅବହେଳାରୁ ଗୁରୁତର ସୁନୀଲ କୁମାର ବିଳମ୍ବରେ ଜିଲ୍ଲା ଚିକିତ୍ସାଳୟରେ ପହଞ୍ଚିଥିଲେ । ଯାହା ଫଳରେ ତାଙ୍କର ମୃତ୍ୟୁ ହୋଇଥିବା ନେଇ ପରିବାର ପକ୍ଷରୁ ଅଭିଯୋଗ ହୋଇଛି । ସୂଚନାଯୋଗ୍ୟ, ସୁଶାନ୍ତ କୁମାର ସାହୁ ନାମକ ଜଣେ ସ୍ଥାନୀୟ ବ୍ୟକ୍ତିଙ୍କ ଟ୍ରକରେ ସୁନୀଲ ଖଲାସି ରୂପେ କାର୍ଯ୍ୟ କରୁଥିଲେ ।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ