କେନ୍ଦୁଝର: ସଭିଙ୍କୁ ଅଲବିଦା କହି ପଞ୍ଚଭୂତରେ ଲୀନ ହେଲେ ଯୁବ ସାମ୍ବାଦିକ ଅରିନ୍ଦମ ଦାସ । କେନ୍ଦୁଝର ମାଟିର ଲଢୁଆ ପୁଅ ତଥା ନିର୍ଭୀକ ସାମ୍ବାଦିକ ଭାବରେ ଘରେ ଘରେ ପରିଚିତ ଅରିନ୍ଦମ ଦାସଙ୍କ ମର ଶରୀର ପଞ୍ଚଭୂତରେ ଲୀନ ହୋଇଛି । କେନ୍ଦୁଝର ରାଜନଗର ପଞ୍ଚାୟତ ରାଇକଳା ଗାଁର ବୈତରଣୀ ନଦୀକୂଳରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି। ଅରିନ୍ଦମଙ୍କ ମୃତ୍ୟୁ ସାରା କେନ୍ଦୁଝର ବାସୀଙ୍କୁ ସ୍ତବ୍ଧ କରିଥିବା ବେଳେ ଜନ୍ମମାଟି ରାଜନଗରରେ ଶୋକାକୁଳ ପରିସ୍ଥିତି ସୃଷ୍ଟି ହୋଇଛି।
କାନ୍ଦବୋବାଳିରେ ଫାଟୁଛି ରାଇକଳା, ଗାଁ ମାଟିରୁ ଅଲବିଦା କହିଲା ଅରିନ୍ଦମ
ଗତକାଲିର ଘଟଣା ଘଟିବା ସମୟରୁ ଶେଷକୃତ୍ୟ ସମ୍ପର୍ଣ୍ଣ ହେବା ପର୍ଯ୍ୟନ୍ତ ଗାଁରେ କାହାରି ଘରେ ଚୁଲି ଜଳିନି। ଅରିନ୍ଦମଙ୍କ ପରିବାରରେ କାହାରି ଆଖିରୁ ଲୁହ ଶୁଖି ନଥିବା ବେଳେ ବାରମ୍ବାର ଚେତାଶୂନ୍ୟ ହୋଇଯାଉଛନ୍ତି ତାଙ୍କ ବିଧବା ମା’ ଏବଂ ପତ୍ନୀ । ଅରିନ୍ଦମ ତାଙ୍କ ବିଧବା ମା’ଙ୍କ ଏକ ମାତ୍ର ପୁଅ ଥିବାବେଳେ ଏପରି ଅକାଳ ମୃତ୍ୟୁରେ ପରିବାର ଅସହାୟ ହୋଇ ପଡିଛି।