କେନ୍ଦ୍ରାପଡା: ଭାଇ ସାଜିଲା ଭଗାରୀ । ପାରିବାରିକ କଳହକୁ ନେଇ ଭାଇର ଜୀବନ ନେଲା ଭାଇ । କଟୁରୀରେ ହାଣି ବଡ ଭାଇକୁ ହତ୍ୟା କଲା ସାନ ଭାଇ । ଏଭଳି ବିଭତ୍ସ ହତ୍ୟାକାଣ୍ଡ ଘଟିଛି କେନ୍ଦ୍ରାପଡ଼ା ପଟ୍ଟାମୁଣ୍ଡାଇ ପୌରାଞ୍ଚଳ ୧ନଂ ୱାର୍ଡ ଷଣ୍ଢପଲ୍ଲୀ ଗ୍ରାମରରେ । ମୃତକ ଜଣଙ୍କ ହେଉଛନ୍ତି ଅନୁପମ ବେହେରା । ଏହି ହତ୍ୟା ଘଟଣାର ଅଭିଯୁକ୍ତ ସାନ ଭାଇକୁ ଗିରଫ କରିଛି ପୋଲିସ ।
ମିଳିଥିବା ସୂଚନା ଅନୁଯାୟୀ, ଆଜି ସକାଳ ସମୟରେ ନିଦରୁ ଉଠିବା ପରେ ଅନୁପମ ବେହେରା ଓ ସାନ ଭାଇ ସନାତନ ମଧ୍ୟରେ ବଚସା ହୋଇଥିଲା । ଯାହା ପର ମୁହୁର୍ତ୍ତରେ ଉଗ୍ରରୂପ ଧାରଣା କରିଥିଲା । ଏଥିରେ ଉତକ୍ଷିପ୍ତ ହୋଇ ସାନ ଭାଇ ସନାତନ ବେହେରା ବଡ ଭାଇ ଅନୁପମ ବେହେରାକୁ ଏକ ଧାରୁଆ ଅସ୍ତ୍ରରେ ଆକ୍ରମଣ କରିଥଲା । ଫଳରେ ଅନୁପମ ବେହେରାଙ୍କ ମୁହଁ ଓ କାନ୍ଧରେ ଗଭୀର ଆଘାତ ଲାଗିଥିଲା । ଘଟଣାସ୍ଥଳରେ ହିଁ ବଡ଼ ଭାଇ ଟଳି ପଡିଥିବା ବେଳେ ସାନ ଭାଇ ଫେରାର ହୋଇଯାଇଥିଲା । ଅନୁପମଙ୍କୁ ମୁର୍ମୁଷୁ ଅବସ୍ଥାରେ ଦେଖି ସ୍ଥାନୀୟ ଲୋକେ ଉଦ୍ଧାର କରି ସଙ୍ଗେସଙ୍ଗେ ପଟ୍ଟାମୁଣ୍ଡାଇ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିଲେ । କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏନେଇ ପଟ୍ଟାମୁଣ୍ଡାଇ ଥାନାରେ ଅଭିଯୋଗ ପରେ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।