କେନ୍ଦ୍ରାପଡା: ଆଜି ସାରା ଦେଶ ରଙ୍ଗର ପର୍ଵ ହୋଲି ପାଇଁ ଆନନ୍ଦ ଉଲ୍ଲାସରେ ମସଗୁଲ ଥିଲା। ରଙ୍ଗର ଖେଳ ପାଇଁ ଗାଁ ଠାରୁ ସହର ହୋଇଥିଲା ଚଳଚଞ୍ଚଳ। ସମସ୍ତେ ହୋଲିରେ ମସଗୁଲ ଥିବା ବେଳେ ହୋଲିରେ ଆଜି ଅପରାହ୍ନରେ ଏକ ଦୁଃଖଦ ଘଟଣା ସାମ୍ନାକୁ ଆସିଛି। କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ଥାନା କେଶପୁର ପଞ୍ଚାୟତ ଦେବଳା ଗ୍ରାମରେ ହୋଲି ଖେଳି ସାରି ବ୍ରାହ୍ମଣୀ ନଦୀରେ ଗାଧଉଥିବା ବେଳେ ଅସାବଧାନତା ବଶତଃ ହଠାତ ବୁଡି ଯାଇଥିଲେ ଦୁଇ ଯୁବକ। ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଥିଲେ ମଧ୍ୟ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ତେବେ ମୃତକ ଦୁଇ ଜଣ ହେଲେ ପଟ୍ଟାମୁଣ୍ଡାଇ ଥାନା ଦେବଳା ଗ୍ରାମର 43 ବର୍ଷୀୟ ସୁଜିତ ଦାସ ଓ 24 ବର୍ଷୀୟ ଚିନ୍ମୟ ଦାସ ବୋଲି ଜଣା ପଡିଛି।
ତେବେ ସୁଜିତ ଟେଣ୍ଟ ହାଉସ କାମ କରୁଥିବା ବେଳେ ଚିନ୍ମୟ ଏୟାରଟେଲ ପେମେଣ୍ଟ ବ୍ୟାଙ୍କରେ କାମ କରୁଥିଲେ। ଆଜି ହୋଲି ପାଇଁ ଗାଁ ଯୁବକଙ୍କ ସହ ମିଶି ଉଭୟ ରଙ୍ଗ ଖେଳିଥିବା ବେଳେ ଅପରାହ୍ନରେ ବ୍ରାହ୍ମଣୀ ନଦୀକୁ ଗାଧୋଇବା ପାଇଁ ଯାଇଥିଲେ। ପ୍ରଥମେ ସୁଜିତ ଅକାତ ପାଣିରେ ବୁଡି ଯାଉଥିବା ଦେଖି ଚିନ୍ମୟ ତାଙ୍କୁ ଉଦ୍ଧାର କରିବା ପାଇଁ ପାଣି ଭିତରକୁ ଯାଇଥିଲେ। ତେବେ ଉକ୍ତ ସ୍ଥାନଟି ଗଣ୍ଡ ହୋଇଥିବାରୁ 2ଜଣ ଯାକ ବୁଡି ଯାଇ ପାଣି ପିଇ ମୁର୍ମୁଷ ହୋଇଥିଲେ। ଉପସ୍ଥିତ ଲୋକମାନେ ଉଦ୍ଧାର ପାଇଁ ଡାକ ପକାଇଥିଲେ ମଧ୍ୟ କେହି ପାଣି ଭିତରକୁ ପଶିବା ପାଇଁ ସାହସ ଜୁଟାଇ ପାରିନଥିଲେ। ପରେ ଅଗ୍ନିଶମ ବିଭାଗକୁ ଫୋନ କରିଥିବା ବେଳେ ଏହି ବାଟ ଦେଇ ଯାଉଥିବା ତମାଳ ଶାସନ ଗାଁର ସଂଖ୍ୟାଲଘୁ ସମ୍ପ୍ରଦାୟର ୨୨ ବର୍ଷୀୟ ଯୁବକ ଶେଖ କରନ ପାଣି ଭିତରକୁ ଲମ୍ଫ ମାରି ଉଭୟଙ୍କୁ ଉଦ୍ଧାର କରିଥିଲେ।