କେନ୍ଦ୍ରାପଡ଼ା: ଠକେଇ ଅଭିଯୋଗରେ ଜେଲ ଗଲେ ରାଜକନିକା ଦେଉଳି ସମବାୟ ସମିତିର ପୂର୍ବତନ ସମ୍ପାଦକ ମୃତ୍ୟୁଞ୍ଜୟ ରାଉଳ । ଜାଲ ଦସ୍ତଖତ ଓ ଜାଲ ଟିପ ଚିହ୍ନ ଦେଇ ଋଣ ଆବେଦନ କରିଥିବା ଅଭିଯୋଗର ଦୀର୍ଘ ୧୦ ବର୍ଷ ପରେ ଗିରଫ କଲା ରାଜକନିକା ପୋଲିସ । ପୋଲିସର ସୂଚନା ଅନୁଯାୟୀ,ଗତ ୨୦୧୨ ମସିହାରେ ଦେଉଳି ସମବାୟ ସମିତିରେ ଚକ୍ରଧର ମହାନ୍ତିଙ୍କ ଅଗୋଚରରେ ୪,୩୨,୦୦୦ ଟଙ୍କାର ଋଣ ଉଠାଣ କରାଯାଇଥିଲା।
ଠକେଇର ୧୦ ବର୍ଷ ପରେ ଦେଉଳି ସମବାୟ ସମିତିର ପୂର୍ବତନ ସମ୍ପାଦକ ଗିରଫ
ଜାଲ ଦସ୍ତଖତ ଓ ଜାଲ ଟିପ ଚିହ୍ନ ଦେଇ ଋଣ ଆବେଦନ କରିଥିବା ଅଭିଯୋଗରେ ଦେଉଳି ସମବାୟ ସମିତିର ପୂର୍ବତନ ସମ୍ପାଦକ ଗିରଫ । ଅଧିକ ପଢନ୍ତୁ
ପ୍ରଥମେ ଚକ୍ରଧରଙ୍କ ନାମରେ ଏକ ଋଣଗ୍ରହୀତା ଦସ୍ତାବିଜ ପ୍ରସ୍ତୁତ କରାଯାଇ ଋଣ ଆବେଦନ କରାଯାଇଥିଲେ ମଧ୍ୟ ତତ୍କାଳୀନ କଟକ କେନ୍ଦ୍ର ସମବାୟ ସମିତି ମ୍ୟାନେଜର ଏହି ଋଣ ଆବେଦନକୁ ନାକଚ କରିଥିଲେ । ପରବର୍ତ୍ତୀ ସମୟରେ ସମ୍ପାଦକ ମୃତ୍ୟୁଞ୍ଜୟ ରାଉଳ, ଚକ୍ରଧରଙ୍କ ଭାଇ ବଜରପୁର ଗାଁର ଗଦାଧର ମହାନ୍ତି, କାଳିସିପଡା ଗାଁର ଅକ୍ଷୟ ନାୟକ ଓ ପୋରଳ ଗାଁର ବସନ୍ତ ମଲ୍ଲିକ ମିଳିତ ହୋଇ ଅକ୍ଷୟ ନାୟକଙ୍କୁ ସବ ରେଜିଷ୍ଟ୍ରର କାର୍ଯ୍ୟାଳୟରେ ଚକ୍ରଧର ମହାନ୍ତି ଦର୍ଶାଇ ତାଙ୍କ ଟିପଚିହ୍ନ ଓ ଜାଲ ଦସ୍ତଖତ କରି ଋଣ ଆବେଦନ କରିଥିଲେ ।
ଏହି ଘଟଣା ଉଭୟ ମ୍ୟାନେଜର ଓ ଚକ୍ରଧର ଜାଣିବା ପରେ ରାଜକନିକା ଥାନାରେ ୨୦୧୨ରେ ଭାଇ ଗଦାଧର,ବସନ୍ତ ଓ ଅକ୍ଷୟଙ୍କ ନାମରେ ଏକ ଲିଖିତ ଅଭିଯୋଗ କରିଥିଲେ। ଏହି ତିନିଜଣଙ୍କୁ ପୂର୍ବରୁ ଓଡିଶା ଉଚ୍ଚ ନ୍ୟାୟାଳୟ ଜାମିନ ପ୍ରଦାନ କରିଥିବା ବେଳେ ପୋଲିସ ତଦନ୍ତରେ ସମ୍ପାଦକ ମୃତ୍ୟୁଞ୍ଜୟ ହିଁ ମୁଖ୍ୟ ଅଭିଯୁକ୍ତ ବୋଲି ଜଣାପଡିଥିଲା । ତେବେ ସମବାୟ ସମିତିର ବିଭିନ୍ନ ଦୁର୍ନୀତିରେ ସମ୍ପୃକ୍ତି ନେଇ ପ୍ରମାଣ ମିଳିବା ପରେ ମୃତ୍ୟୁଞ୍ଜୟକୁ ଗତ ୨୦୧୯ ମସିହାରେ ବିଭାଗ ନିଲମ୍ବିତ କରିଥିଲା । ତେବେ ଗୁରୁବାର ରାଜକନିକା ଥାନା ଅଧିକାରୀ ବିଲ୍ଵମଙ୍ଗଳ ସେଠୀ ଏହି ଠକେଇ ଅଭିଯୋଗ ଘଟଣାରେ ଅଭିଯୁକ୍ତ ମୃତ୍ୟୁଞ୍ଜୟକୁ ଗିରଫ କୋର୍ଟଚାଲାଣ କରିଥିବା ଜଣାପଡିଛି । ସେଠାରେ ଜାମିନ ନାମଞ୍ଜୁର ହେବାରୁ ମୃତ୍ୟୁଞ୍ଜୟକୁ କେନ୍ଦ୍ରାପଡ଼ା ଉପ କାରଗାରକୁ ପଠାଇ ଦିଆଯାଇଥିବା ସୂଚନା ମିଳିଛି।
TAGGED:
ଦେଉଳି ସମବାୟ ସମିତିରେ ଠକେଇ