କେନ୍ଦ୍ରାପଡ଼ା:ଶିକ୍ଷକ ବଦଳିକୁ ନେଇ ସ୍କୁଲରେ ପଡିଲା ତାଲା । ଆଖିରେ ଆଖିଏ ଲୁହ ଛାତିରେ ସମ୍ଭାଳି ହେଉନାହିଁ କୋହ । ବିଦ୍ୟାଳୟରୁ ଜଣେ ଶିକ୍ଷକ ବଦଳିକୁ ନେଇ ପ୍ରଥମେ କୋହଭରା କାନ୍ଦ ଆଉ ତାପରେ ତାଲାବନ୍ଦ ଆନ୍ଦୋଳନ । ଏଭଳି ଏକ ଦୃଶ୍ୟ ଦେଖିବାକୁ ମିଳିଛି ଆଳି ବ୍ଲକ ବାଳକାଟି ପଞ୍ଚାୟତ ଅନ୍ତର୍ଗତ ରାଣୀପୋଖରୀ ସରକାରୀ ପ୍ରାଥମିକ ବିଦ୍ୟାଳୟରେ ।
ସୂଚନା ମୁତାବକ ବିଦ୍ୟାଳୟର ପ୍ରଧାନ ଶିକ୍ଷକ ସେକ ଅଲସନ ଅଲ୍ଲୀଙ୍କୁ ଖଣ୍ଡିଆପାଟଣା ପ୍ରୋଜେକ୍ଟ ପ୍ରାଥମିକ ବିଦ୍ୟାଳୟକୁ ବଦଳିକୁ ନେଇ ତାଲା ପକାଇଛନ୍ତି ଛାତ୍ରଛାତ୍ରୀ । ଶିକ୍ଷକ ବଦଳିକୁ ନେଇ ଛାତ୍ରଛାତ୍ରୀ ଓ ଅଭିଭାବକ ମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଥିବା ବେଳେ ଛାତ୍ରଛାତ୍ରୀ ମାନେ ପାଠପଢା ବନ୍ଦ କରି ପ୍ରଧାନ ଶିକ୍ଷକଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି । ଏଥିସହ ଶିକ୍ଷକଙ୍କ ବଦଳି କରାଯାଇଥିବା ଖବର ପାଇବା ପରେ ଛାତ୍ରଛାତ୍ରୀ ଓ ଅଭିଭାବକ ମାନେ ବିରୋଧ କରିବା ସହିତ ଛାତ୍ରଛାତ୍ରୀ ମାନେ ଟିସି ନେଇ ଅନ୍ୟତ୍ର ଯିବାକୁ କହିଛନ୍ତି । ଏଥି ସହିତ ଅଭିଭାବକ ମାନେ ବିଦ୍ୟାଳୟରେ ସବୁଦିନ ପାଇଁ ତାଲା ପକାଇ ଦେବାକୁ ମଧ୍ୟ ଚେତାବନୀ ଦେଇଛନ୍ତି ।