ଟିକଟକରେ ଅଶ୍ଳୀଳ ଭିଡିଓ ଭାଇରାଲ ପରେ ନାବାଳିକାଙ୍କ ଆତ୍ମହତ୍ୟା

କେନ୍ଦ୍ରାପଡା ଜିଲ୍ଲା ପାଟକୁରା ଥାନା ଅନ୍ତର୍ଗତ ରାମଚନ୍ଦ୍ରପୁର ଗାଁରେ ଅଭାବନୀୟ ଘଟଣା । ଟିକଟକରେ ଅଶ୍ଳୀଳ ଭିଡିଓ ଭାଇରାଲ ପରେ ନାବାଳିକାଙ୍କ ଆତ୍ମହତ୍ୟା । ଅଭିଯୁକ୍ତ ଦ୍ବୟ ଫେରାର ଥିବା ସୂଚନା ରହିଛି ।

କେନ୍ଦ୍ରାପଡା: ସୋସିଆଲ ମିଡ଼ିଆ ଟିକଟକରେ ଅଶ୍ଳୀଳ ଭିଡିଓ ଭାଇରାଲ ପରେ ଆତ୍ମହତ୍ୟା କରିଛନ୍ତି ଜଣେ ନାବାଳିକା । ଏଭଳି ଅଭାବନୀୟ ଘଟଣା ଘଟିଛି କେନ୍ଦ୍ରାପଡା ଜିଲ୍ଲା ପାଟକୁରା ଥାନା ଅନ୍ତର୍ଗତ ରାମଚନ୍ଦ୍ରପୁର ଗାଁରେ ।

ସୂଚନାନୁସାରେ, ମୃତକ ଚଳିତଥର ଦଶମ ଶ୍ରେଣୀରେ ପରୀକ୍ଷାରେ କୃତକାର୍ଯ୍ୟ ହୋଇଥିଲେ । ମାଟ୍ରିକ ପରୀକ୍ଷା ପରେ +2 ନାମଲେଖାର ଆବେଦନ ପାଇଁ ଗାଁରେ ଥିବା ଏକ ଷ୍ଟୁଡିଓକୁ ଫଟୋ ଉଠାଇବାକୁ ଯାଇଥିଲେ । ମାତ୍ର ରୀମାଙ୍କ ପାଇଁ ଫଟୋ ଉଠାଇବା କାଳ ହୋଇଥିଲା ।

ମୃତକ ଫଟୋ ଉଠାଇ ଆସିବା ପରେ ଷ୍ଟୁଡିଓ ମାଲିକ ତଥା ଫଟୋଗ୍ରାଫର ଅମର ଦାସ ଏବଂ ତା'ର ସହଯୋଗୀ ରଶ୍ମିରଞ୍ଜନ ମଲ୍ଲିକ ତା' ଫଟୋକୁ ଏଡିଟ୍ କରି ଟିକଟକରେ ଅଶ୍ଲୀଳ ଭିଡିଓ କରି ଭାଇରାଲ କରିଥିଲେ । ଏହି ଏଡିଟ୍ ଫଟୋ ଗାଁ ତଥା ଅଞ୍ଚଳର ମୋବାଇଲରୁ ମୋବାଇଲ ଘୁରି ବୁଲିଥିଲା । ଏପରିକି ଚେନ୍ନାଇର ରହୁଥିବା ମୃତକଙ୍କ ବଡ଼ଭାଇଙ୍କ ମୋବାଇଲକୁ ମଧ୍ୟ ଏହି ଅଶ୍ଳୀଳ ଭିଡିଓ ଭାଇରାଲ ହୋଇଥିଲା । ଘଟଣାସମ୍ପର୍କରେ ଜାଣିବା ପରେ ପରଦିନ ମୃତକଙ୍କ ବଡଭାଇ ଗାଁକୁ ଫେରି ଘଟଣା ସମ୍ପର୍କରେ ଅବଗତ ହୋଇଥିଲେ ।

ଏସମ୍ପର୍କରେ ଅମର ଏବଂ ତାର ସହଯୋଗୀ ରଶ୍ମିରଞ୍ଜନକୁ ଭେଟି ମୃତକଙ୍କ ପରିବାର ଭିଡିଓ ସମ୍ପର୍କରେ ପଚାରି ବୁଝିଥିଲେ । ତେବେ ଅଭିଯୁକ୍ତ ଦ୍ବୟ ମୃତକଙ୍କ ବଡ଼ଭାଇଙ୍କୁ ଅଶ୍ଳୀଳ ଭିଡିଓ ବ୍ୟବହାର କରିବା ସହିତ ଆହୁରି ଅନେକ ଭିଡିଓ ସୋସିଆଲ ମିଡିଆରେ ଭାଇରାଲ କରିବା ନେଇ ଧମକ ଦେଇଥିଲେ । ଏସବୁ ପରେ ମୃତକଙ୍କ ବଡ଼ଭାଇ ପାଟକୁରା ଥାନାରେ ଅଭିଯୁକ୍ତମାନଙ୍କ ବିରୋଧରେ ଲିଖିତ ଅଭିଯୋଗ କରିଥିଲେ । ମାତ୍ର ମୃତକ ଲୋକଲଜ୍ୟାକୁ ସହି ନପାରି ରଶି ଲଗାଇ ଆତ୍ମହତ୍ୟା କରିଛି ।

ସେପଟେ ନିଜ ଅଳିଅଲି ସାନଝିଅକୁ ହରାଇ ଦୁଃଖରେ ପରିବାର ଲୋକେ । ମାତ୍ର ପୋଲିସର ତଦନ୍ତରେ ଶିଥିଳତା ଯୋଗୁଁ ଅଭିଯୁକ୍ତ ଦ୍ବୟ ଫେରାର ହେବାକୁ ସମର୍ଥ ହୋଇଛନ୍ତି ।

ଟିକଟକ୍ ଭିଡିଓରେ ଜଣେ ନିଷ୍ପାପ ଓ ନିରୀହ ନାବାଳିକାର ଜୀବନ ଯାଇଥିବା ବେଳେ ଜିଲ୍ଲାରେ ଏଭଳି ଘଟଣା ପ୍ରଥମ ଥର ପାଇଁ ଘଟିଛି । ଏବେ ଅଭିଯୁକ୍ତ ଫେରାର ମାମଲାରେ ପୋଲିସର ନିଷ୍କ୍ରିୟତା ଉପରେ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି ।

କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ