କେନ୍ଦ୍ରାପଡ଼ା: ଜିଲ୍ଲା ଆଳି ଓ ରାଜକନିକା ଥାନା ଅଞ୍ଚଳରେ ଗତ ଦୁଇମାସ ହେବ ଲୁଟେରାମାନେ ସକ୍ରିୟ ହୋଇ ବିଭିନ୍ନ ସ୍ଥାନରେ ଲୁଟପାଟ ଚଳାଇଥିଲେ । ଏହି ଲୁଟପାଟ ଘଟଣା ଆଳି ଓ କନିକା ପୋଲିସର ମୁଣ୍ଡ ବ୍ୟଥାର କାରଣ ପାଲଟିଥିଲା । ହେଲେ କେନ୍ଦ୍ରାପଡ଼ା ଏସପିଙ୍କ ନିର୍ଦ୍ଦେଶରେ ସ୍ପେଶାଲ ସ୍କ୍ବାର୍ଡ ଓ SDPOଙ୍କ ମିଳିତ ଉଦ୍ୟମରେ ଏକ ଗ୍ୟାଙ୍ଗକୁ ଗିରଫ କରିବାରେ ସଫଳ ହୋଇଛି ପୋଲିସ ।
ଏହି ଲୁଟେରା ଗ୍ୟାଙ୍ଗ ଆଳି ଥାନା ବଡ଼ଆଙ୍କୋ ଗ୍ରାମରେ ଗତ 7 ତାରିଖ ରାତିରେ ସାଧୁଚରଣ ମହାଳିକଙ୍କ ଘରୁ ସଶସ୍ତ୍ର ଡକାୟତି ଓ ରାଜକନିକା ଥାନା ଆଗପଡା ମିନତୀ ମଲିକଙ୍କ ଘରୁ ଏପ୍ରିଲ 30 ତାରିଖ ରାତିରେ ଡକାୟତି ଘଟଣାରେ ସମ୍ପୃକ୍ତ ଥିଲେ । ଏ ନେଇ କେନ୍ଦ୍ରାପଡ଼ା ଏସପି ଆଜି ଆଳି ଥାନା ପରିସରରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ଲୁଟେରା ଗ୍ୟାଙ୍ଗ ନିକଟରୁ 2 ଲକ୍ଷ 41 ହଜାର ଟଙ୍କା ମୂଲ୍ୟର 53 ଗ୍ରାମ ସୁନା, 16 ହଜାର ଟଙ୍କାର 368 ଗ୍ରାମର ରୂପା, 3ଟି ମୋଟର ସାଇକେଲ ଜବତ ହୋଇଛି ।