କେନ୍ଦ୍ରାପଡା: ସ୍ଥାନୀୟ ରାଜକନିକା ଦେଉଳସାହି ଗାଁରେ ଘଟିଯାଇଛି ଏକ ଦୁଃଖଦ ଘଟଣା। ଚାଷ କାମ ସାରି ଫେରିବା ବେଳେ ବନ୍ୟା ପାଣିରେ ଭାସି ଯାଇ ଆଖି ବୁଜିଛନ୍ତି ଜଣେ ଚାଷୀ । ସୂଚନା ଅନୁଯାୟୀ ରାଜକିଶୋର ବେହୁରା ନାମକ ଜଣେ ଚାଷୀ ଗୁରୁବାର ବିଲକୁ ଯାଇ ଫେରିନଥିବା ବେଳେ ପରିବାର ଲୋକେ ତାଙ୍କୁ ଖୋଜାଖୋଜି ଆରମ୍ଭ କରିଥିଲେ । ଏଥିରେ ବନ୍ୟା ଜଳରେ ତାଙ୍କ ମୃତଦେହ ଭାସୁଥିବା ଦେଖାଯାଇଥିଲା । ଘରକୁ ଫେରିବା ବାଟରେ ଥିବା ବୈତରଣୀ ନଦୀର ବନ୍ୟା ଜଳରେ ଭାସିଯାଇ ତାଙ୍କର ମୃତ୍ୟୁ ହୋଇଥିବା ଅନୁମାନ କରାଯାଉଛି ।
ନଦୀ ଜଳରେ ବୁଡି ଚାଷୀ ମୃତ, ସରକାରୀ ସହାୟତା ପାଇଁ ତେଜିଲା ଦାବି ସେପଟେ ରାଜକିଶୋରଙ୍କ ଭାସୁଥିବା ମୃତଦେହକୁ ବନ୍ୟା ଜଳରୁ ଉଦ୍ଧାର କରାଯାଇ ପ୍ରଥମେ ଓଲାଭର ମେଡିକାଲ ଓ ପରେ ରାଜକନିକା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ରାଜକିଶୋରଙ୍କ ଏପରି ଅକାଳ ବିୟୋଗରେ ପରିବାର ଲୋକେ ଭାଙ୍ଗି ପଡିଥିବା ବେଳେ ରାଜକନିକା ସ୍ବାସ୍ଥ୍ୟକେନ୍ଦ୍ରରେ ପୋଲିସ ପହଞ୍ଚି ତାଙ୍କ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି । ତେଣେ ଏପରି ସ୍ଥିତିରେ ରାଜକିଶୋରଙ୍କ ପରିବାରକୁ ସରକାରୀ ସହାୟତା ଯୋଗାଇଦେବା ପାଇଁ ସ୍ଥାନୀୟବାସୀ ଦାବି କରିଛନ୍ତି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
