କେନ୍ଦ୍ରାପଡ଼ା:ବିଦେଶରେ ଚାକିରି ଦେବାକୁ କହି ପ୍ରଲୋଭନ ଦେଖାଇଥିଲା ଦଦାଲ । ଚାକିରି ବାବଦକୁ ୨୫ ଜଣ ଯୁବକଙ୍କ ଠାରୁ ଜଣକା ପ୍ରତି ୧ ଲକ୍ଷ ଟଙ୍କା ମାଗିଥିଲା । ଏପରିକି ପାସପୋର୍ଟ ମଧ୍ୟ ଦେଇଥିଲା । ଏହାପରେ ଚୂନ ଲଗାଇ ଫେରାର ମାରିଛି ଠକ । କେନ୍ଦ୍ରାପଡ଼ା ଆଳି ଥାନାରେ ଏନେଇ ଅଭିଯୋଗ ହେବା ପରେ ଘଟଣାଟି ସାମ୍ନାକୁ ଆସିଛି । କେନ୍ଦ୍ରାପଡ଼ା ଜିଲ୍ଲା ଚାନ୍ଦବାଲି ଅଞ୍ଚଳର ୫ ଯୁବକ ଠକାମିର ଶିକାର ହୋଇ ଆଳି ଥାନାର ଦ୍ବାରସ୍ଥ ହୋଇଛନ୍ତି।
କେନ୍ଦ୍ରାପଡ଼ା ଓ ପଡୋଶୀ ଭଦ୍ରକ ଜିଲ୍ଲାର ଉଚ୍ଚଶିକ୍ଷିତ ଯୁବକ ତଥା ଚାକିରି ଅନୁସନ୍ଧାନରେ ଥିବା ବ୍ୟକ୍ତିମାନଙ୍କୁ ବିଦେଶରେ ଚାକିରି ଏବଂ ପାସପୋର୍ଟ କରାଇଦେବା ଆଳ ଦେଖାଇ ୨୫ ଲକ୍ଷ ଟଙ୍କା ଠକି ନେଇଥିବା ଅଭିଯୋଗ ହୋଇଛି । ଆଳି ଥାନା ଅନ୍ତର୍ଗତ ବେଲସରପୁର ଗାଁର ଅମୂଲ୍ୟ ମଲିକ ନାମକ ଜଣଏ ବ୍ୟକ୍ତି କେନ୍ଦ୍ରାପଡା ଜିଲ୍ଲାର ବିଭିନ୍ନ ସ୍ଥାନରୁ ୨୦ ଜଣ ଯୁବକ ଓ ଭଦ୍ରକ ଚାନ୍ଦବାଲି ଅଞ୍ଚଳର ୫ ଜଣ ଯୁବକଙ୍କଠୁ ୧ ଲକ୍ଷ ଟଙ୍କା ହିସାବରେ ୨୫ ଜଣଙ୍କ ଠାରୁ ୨୫ ଲକ୍ଷ ଟଙ୍କା ନେଇ ଛୁ ମାରିଛି । ସେମାନଙ୍କୁ କୁଏତରେ ନିଯୁକ୍ତି ଦେବାକୁ କହି ସେମାନଙ୍କଠାରୁ ଟଙ୍କା ନେଇ ଦିଲ୍ଲୀ ଡକାଇବା ପରେ କୌଣସି ପାସପୋର୍ଟ ଦେଇନଥିଲା । ବିଦେଶ ଯିବାକୁ ଆଶାବାନ୍ଧି ଯାଇଥିବା ଯୁବକମାନେ ଦିଲ୍ଲୀର ଜଗନ୍ନାଥ ମନ୍ଦିରରେ ଆଶ୍ରୟ ନେଇ ୧୫ ଦିନ ପରେ ଘରକୁ ଫେରିଥିଲେ ।