କେନ୍ଦ୍ରାପଡା: ସମ୍ଭାବ୍ୟ ବାତ୍ୟା 'ବୁଲବୁଲ' ପ୍ରଭାବରେ କେନ୍ଦ୍ରାପଡ଼ା ଜିଲ୍ଲାରେ ସକାଳୁ ଆରମ୍ଭ ହୋଇଛି ଲଗାଣ ବର୍ଷା । ଏହାର ପ୍ରଭାବରେ ଜିଲ୍ଲାର ସମସ୍ତ ବ୍ଲକକୁ ଆଲର୍ଟ କରାଯାଇଛି । ଏହି ସାମୁଦ୍ରିକ ଝଡ ବନ୍ଦରନଗରୀ ପାରାଦୀପ ଉପକୂଳ ଠାରୁ ବର୍ତ୍ତମାନ ପ୍ରାୟ 250 କିମି ଦୂରରେ ରହିଛି । ଏନେଇ ଜିଲ୍ଲାର ୯ଟି ବ୍ଲକ ଓ ଦୁଇଟି ମୁନସିପାଲିଟିରେ ସତର୍କ ସୂଚନା ଜାରି ହୋଇଛି ।
ଭିଜେଇବ 'ବୁଲବୁଲ',ମୁକାବିଲା ପାଇଁ କେନ୍ଦ୍ରାପଡାରେ ଏନଡିଆରଏଫ୍ ଟିମ ଲଗାଣ ବର୍ଷା ଯୋଗୁଁ ହେବାକୁ ଥିବା କ୍ଷୟକ୍ଷତି ପାଇଁ ଜିଲ୍ଲା କୃଷି ବିଭାଗ ପକ୍ଷରୁ ଚାଷୀ ଭାଇମାନଙ୍କୁ ମାଇକ ମାଧ୍ୟମରେ ସତର୍କ କରାଯାଇଛି । ଏହାସହ ବଜାର ଦରକୁ ନିୟନ୍ତ୍ରଣ ଓ ଲୋକମାନଙ୍କୁ ଭୟଭୀତ ନହେବା ପାଇଁ ପରାମର୍ଶ ଦିଆଯାଇଛି ।
ବର୍ତ୍ତମାନ ସୁଦ୍ଧା କେନ୍ଦ୍ରାପଡା ଜିଲ୍ଲାରେ ବର୍ଷାର ପ୍ରଭାବ ଏତେଟା ଦେଖାଯାଇନଥିବା ବେଳେ ସ୍ଥାନାନ୍ତରଣ କାର୍ଯ୍ୟ ଆରମ୍ଭ କରାଯାଇନାହିଁ । କିନ୍ତୁ ଜିଲ୍ଲାର ସମସ୍ତ ବ୍ଲକର ବିଡ଼ିଓ ଓ ତହସିଲଦାରଙ୍କୁ ସତର୍କ କରାଯାଇଛି । ଜିଲ୍ଲାରେ NDRFର ଗୋଟିଏ ଟିମ, ODRAFର ଦୁଇଟି ଟିମ, ଅଗ୍ନିଶମ ବିଭାଗର ତିନୋଟି ଟିମ ରହିଥିବା ସୂଚନା ଦେଇଛନ୍ତି ଆପଦକାଳୀନ ଅଧିକାରୀ ସମ୍ବିତ ଶତପଥି ।
NDRFର ୨୫ଜଣିଆ ଟିମ କେନ୍ଦ୍ରାପଡ଼ା ଜିଲ୍ଲାରେ ପହଞ୍ଚି ଉପକୂଳବର୍ତ୍ତୀ ମହାକାଳପଡ଼ା ଓ ରାଜନଗର ବ୍ଳକ ଗସ୍ତରେ ଯାଇଛନ୍ତି । ଜିଲ୍ଲାରେ ବର୍ଷା କିମ୍ବା ବୁଲବୁଲ ପ୍ରଭାବରେ ଭାଙ୍ଗି ପଡିଥିବା ଗଛ, ସାଧାରଣ ଜନତାଙ୍କୁ ସ୍ଥାନାନ୍ତରଣ ଇତ୍ୟାଦି ଦିଗରେ ଏହି ଟିମ ସହଯୋଗ କରିବା ପାଇଁ ମୁଣ୍ଡଳୀରୁ ଆସିଥିବା କହିଛନ୍ତି NDRF ଅଧିକାରୀ ସୁନୀଲ କୁମାର ଶାନ୍ତି ।
ସେହିପରି ଲଗାଣ ବର୍ଷା ଓ ବାତ୍ୟା ପ୍ରଭାବ ପାଇଁ ଜିଲ୍ଲାର ସମସ୍ତ ବିଦ୍ୟାଳୟ ଓ ଅଙ୍ଗନବାଡି କେନ୍ଦ୍ରକୁ ଶୁକ୍ରବାର ଓ ଶନିବାର ବନ୍ଦ ରଖିବା ପାଇଁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ । ସେହିପରି କୃଷକ ମାନଙ୍କ ପାଇଁ ପର୍ଯ୍ୟାପ୍ତ ପରିମାଣରେ ସହଯୋଗ କରିବାକୁ ପ୍ରଶାସନ ପ୍ରସ୍ତୁତ ଥିବା ସୂଚନା ଦେଇଛନ୍ତି ଜିଲ୍ଲାପାଳ । ଅପରପକ୍ଷରେ ଜିରୋ କାଜୁଆଲିଟି ପାଇଁ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି ।
ତେବେ ଗତ ମେ ମାସରେ ଫନି ପ୍ରଭାବରେ ଜିଲ୍ଲାରେ ବ୍ୟାପକ କ୍ଷୟକ୍ଷତି ହୋଇଥିଲା । ଏହାସହ କୃଷିର ବ୍ୟାପକ ନଷ୍ଟ, ସରକାରୀ ଭାବରେ ୪ ଜଣଙ୍କ ମୃତ୍ୟୁ ହୋଇଥିଲା । ତେବେ ଜିଲ୍ଲା ପ୍ରଶାସନ କିପରି 'ବୁଲବୁଲ'ର ସାମ୍ନା କରୁଛି ତାହା ଦେଖିବାକୁ ବାକି ରହିଲା ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
