ଫୁଲବାଣୀ: ଘୋଷଣା ହୋଇଯାଇଛି ନିର୍ବାଚନ ତାରିଖ । ଏହା ସହିତ ଆରମ୍ଭ ହୋଇଯାଇଛି ସମସ୍ତ ପ୍ରକ୍ରିୟା । ଶୃଙ୍ଖଳା ସହକାରେ ନିର୍ବାଚନ କିପରି ସମ୍ପନ୍ନ ହେବ, ସେ ନେଇ ପୋଲିସ ପକ୍ଷରୁ ମଧ୍ୟ ଆରମ୍ଭ ହୋଇଯାଇଛି ସମସ୍ତ ବନ୍ଦୋବସ୍ତ । ବିଶେଷ କରି ମାଓ ପ୍ରବଣ ଅଞ୍ଚଳରେ ରହିଛି ଖାସ ବନ୍ଦୋବସ୍ତ । ଏନେଇ ପ୍ରତିଦିନ ସିଆରପିଏଫର କୋବ୍ରା ବାହୀନି, ଏସଓଜି ଏବଂ ଡିଭିଏଫର ସ୍ବତନ୍ତ୍ର ଟିମ୍ ଆଣ୍ଟି ନକ୍ସଲ ଅପରେସନ ଜାରି ରଖିଛନ୍ତି । ଏହା ସହିତ ଜାରି ରହିଛି ଏରିଆ ଡୋମିନେସନ ଏକ୍ସରସାଇଜ ।
ଇତି ମଧ୍ୟରେ ରବିବାର କନ୍ଧମାଳ ଜିଲ୍ଲା କୋଟଗଡ଼ ଥାନା ଅନ୍ତର୍ଗତ ସୁବର୍ଣ୍ଣଗିରି ନିକଟ ରଢା ଗାଁ ହାତୀପେରୁ ଜଙ୍ଗଲ ପୋଲ ତଳେ ଥିବା ଡମ୍ପ ୟାର୍ଡରୁ ବିପୁଳ ପରିମାଣର ମାଓ ସାମଗ୍ରୀ ଜବତ କରିଛି ସିଆରପିଏଫ ଟିମ୍ । ବିଶେଷ ସୁତ୍ରରୁ ସୂଚନା ପାଇ ଚଢାଉ କରିଥିଲା ଏରିଆ ଡୋମିନେସନ ଟିମ୍ । ଚଢାଉବେଳେ ଲ୍ୟାଣ୍ଡମାଇନ ପାଇଁ ବ୍ୟବହୃତ ବିସ୍ଫୋରକ ସାମଗ୍ରୀ, 25ଟି ଡିଟୋନେଟର, ପିସ୍ତଲ, ଗୁଳି ଏବଂ ବିପୁଳ ପରିମାଣର ମାଓ ସାମଗ୍ରୀ ଜବତ କରାଯାଇଛି ।