ଫୁଲବାଣୀ: ଅଦିନିଆ ବର୍ଷା ଯୋଗୁଁ ଅସହ୍ୟ ଗରମରୁ ସାମାନ୍ୟ ଆଶ୍ବସ୍ତି ସତ । ହେଲେ ଅଦିନିଆ ବର୍ଷା ଫଳରେ କିଛି ସ୍ଥାନରେ ଜନଜୀବନ ପ୍ରଭାବିତ ହୋଇଥିବା ଦେଖିବାକୁ ମିଳିଛି । ଗତକାଲି(ସୋମବାର) ସନ୍ଧ୍ୟା ସମୟରେ କନ୍ଧମାଳ ଜିଲ୍ଲା କୋଟଗଡ଼ ବ୍ଲକର ଜାର୍ଗିପଡ଼ାଠାରେ ବଜ୍ରାଘାତରେ ୧୩ଟି ଗୋରୁଙ୍କ ମୃତ୍ୟୁ ଘଟିଥିବା ଜଣାପଡ଼ିଛି ।
କାଳ ବୈଶାଖୀ ଯୋଗୁଁ ଅଞ୍ଚଳରେ ବହୁ କ୍ଷୟକ୍ଷତି ଘଟିଥିବା ସୂଚନା ମିଳିଛି । ବର୍ଷା ପବନରେ କିଛି ସ୍ଥାନରେ ଗଛ ପଡି ରାସ୍ତା ଅବରୋଧ ହୋଇଛି ତ କାହା ଘରର ଛପର ଉଡ଼ିଯାଇଛି । ପବନ ସହ ଘଡ଼ଘଡ଼ି ଓ ବିଜୁଳି ସହ ବର୍ଷା ହୋଇଛି । ଏଭଳି ସ୍ଥିତିରେ କୋଟଗଡ଼ ବ୍ଳକ ଜର୍ଗିପଡ଼ାର ଏକ ବରଗଛ ତଳେ ଶୋଇଥିବା ୧୩ଟି ଗାଈଙ୍କ ବଜ୍ରାଘାତରେ ମୃତ୍ୟୁ ଘଟିଥିବା ଜଣାପଡ଼ିଛି । ସେଥିମଧ୍ୟରୁ ୯ଟି ଗାଈ ଓ ୪ଟି ବଳଦ ଥିବା ଜଣାପଡ଼ିଛି ।