ଫୁଲବାଣୀ: ଲକଡାଉନ ସମୟରେ ଏଟିଏମ ଲୁଟେରାଙ୍କୁ କାବୁ କରିବାରେ ପୋଲିସଙ୍କୁ ମିଳିଛି ସଫଳତା । ସ୍ଥାନୀୟ ଖଜୁରିପଡା ଥାନା ଅଞ୍ଚଳରେ ଦେଖିବାକୁ ମିଳିଛି ଏହାର ଏକ ନଜିର । ଏଠାରେ କନ୍ଧମାଳ ପୋଲିସର ସାଇବର ଟିମ୍ ହାତରେ ରବିବାର ଧରା ପଡିଛି ଏକ ଏଟିଏମ ଲୁଟେରା । ଗିରଫ ଯୁବକ ଜଣଙ୍କ ସମ୍ପୃକ୍ତ ଥାନା ଅନ୍ତର୍ଗତ ଝାଗଡପଟା ଗ୍ରାମର ରଞ୍ଜନ କୁମାର ସାହୁ ବୋଲି ଜଣା ପଡିଥିବା ବେଳେ ପୋଲିସ ତା’ଠାରୁ ନଗଦ 16 ହଜାର ଟଙ୍କା ଜବତ ଜବତ କରିଥିବା କହିଛନ୍ତି ସାଇବର ଇନସ୍ପେକ୍ଟର ସୌମ୍ୟ ପଣ୍ଡା ।
ଘଟଣା ଅନୁଯାୟୀ, ଗତ 23 ତାରିଖରେ ଖଜୁରିପଡା ଥାନା ଅନ୍ତର୍ଗତ ନାଗଲେଜୁ ଗ୍ରାମର ପରୂପବଦୀ ବେହେରା ନାମ୍ନୀ ଜଣେ ମହିଳା ସ୍ଥାନୀୟ ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ ଏଟିଏମକୁ ଯାଇ ଟଙ୍କା ଉଠାଇବାକୁ ଚେଷ୍ଟା କରୁଥିଲେ । କିନ୍ତୁ ପ୍ରଥମ ଥର ଏଟିଏମ କାର୍ଡ ବ୍ୟବହାର କରୁଥିବାରୁ ଟଙ୍କା ଉଠାଇବାରେ ଅକ୍ଷମ ରୂପବଦୀ ଅଜାଣତରେ ନିଜ ଏଟିଏମ କାର୍ଡ ସେଠାରେ ଛାଡି ପଳାଇ ଆସିଥିଲେ ।
ଏହାର ସୁଯୋଗ ନେଇ ରଞ୍ଜନ ଏଟିଏମ କାର୍ଡ ନେଇ ଚତୁରତାର ସହ ଏହାର ପିନ ଜାଣିବାରେ ସକ୍ଷମ ହୋଇଥିଲା । ପରେ ଏଟିଏମର ସିସିଟିଭି କ୍ୟାମେରାରେ ନିଜେ ଧରା ପଡିବା ଭୟରେ ରଞ୍ଜନ ଅନ୍ୟ ଜଣେ ନାବାଳକକୁ ଏଟିଏମରୁ 20 ହଜାର ଟଙ୍କା କାଢିବା ପାଇଁ କହିଥିଲା । ନାବାଳକ ଜଣଙ୍କ ଏହା କରିବାକୁ ରାଜି ହେଉନଥିଲେ ସୁଦ୍ଧା ରଞ୍ଜନ ଜବରଦସ୍ତ ତାଠାରୁ କାର୍ଯ୍ୟ କରାଇଥିବା ପୋଲିସ ତଦନ୍ତରୁ ସ୍ପଷ୍ଟ ହୋଇଛି ।
ତେବେ ଟଙ୍କା ଉଠାଣ କଥା ମହିଳା ଜଣକ ଜାଣିବା ପରେ ଏନେଇ ଖଜୁରିପଡ଼ା ଥାନାରେ ଗତ 24 ତାରିଖରେ ଏକ ଏତଲା ଦେଇଥିଲେ । ମହିଳା ଜଣଙ୍କ ଅଭିଯୋଗ ଶୁଣିବା ପରେ ପୋଲିସ କେସ ନଂ 58/2020 ରେ ଏକ ମାମଲା ରୁଜୁ କରିଥିଲା । ପରେ ଏହାର ତଦନ୍ତ ଭାର ପୋଲିସ ବିଭାଗର ସାଇବର୍ ଟିମ୍କୁ ଦିଆଯାଇଥିଲା । ତଦନ୍ତରେ ପୋଲିସ ସିସିଟିଭି ଫୁଟେଜରୁ ନାବାଳକକୁ ଚିହ୍ନଟ କରି ତାଠାରୁ ସବୁ ସତ କଥା ଜାଣିବାକୁ ପାଇଥିଲା । ପରେ ପୋଲିସ ପୂର୍ବ ଯୋଜନା ମୁତାବକ ରବିବାର ରଞ୍ଜନକୁ ତା’ ଘରୁ ଗିରଫ କରିବା ସହ 16 ହଜାର ଟଙ୍କା ଜବତ କରିଛି । ରଞ୍ଜନ ବଳକା 4 ହଜାର ଖର୍ଚ୍ଚ କରି ଦେଇଥିବା ବେଳେ ତାକୁ କୋର୍ଟ ଚାଲାଣ କରାଯିବା ନେଇ ସୂଚନା ଦେଇଛନ୍ତି ତଦନ୍ତ ଅଧିକାରୀ ସମୀର କୁମାର ରାଉତ ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
