ଚରମ ଅବହେଳା: ଶିକ୍ଷାନୁଷ୍ଠାନରୁ କୁଆଡେ ଗଲେ ଛାତ୍ରୀ ?

ଶିକ୍ଷାନୁଷ୍ଠାନରୁ ଛାତ୍ରୀ ନିଖୋଜ । ଜିଲ୍ଲାପାଳଙ୍କ ଆଗରେ ଅଭିଯୋଗ ଆଣିଲେ ଛାତ୍ରୀଙ୍କ ସମ୍ପର୍କୀୟ ଲୋକେ ।

କନ୍ଧମାଳ: ଜିଲ୍ଲା ଘୁ.ଉଦୟଗିରି ସୁଭଦ୍ରା ମହତାବ ସେବା ସଦନରୁ ଛାତ୍ରୀ ନିଖୋଜ ହୋଇଥିବା ଅଭିଯୋଗ ହୋଇଛି । ଫୁଲବାଣୀ ଅତିରିକ୍ତ ଜିଲ୍ଲାପାଳଙ୍କ ନିକଟରେ ଚତୁର୍ଥ ଶ୍ରେଣୀ ଛାତ୍ରୀ ନିଖୋଜ ହୋଇଥିବା ନେଇ ସମ୍ପର୍କୀୟ ଅଭିଯୋଗ କରିଛନ୍ତି ।

ସୂଚନାନୁଯାୟୀ, ଗତ ଫେବୃୟାରୀ 28ରୁ ଛାତ୍ରୀଙ୍କ କୌଣସି ପତ୍ତା ମିଳୁନଥିବାବେଳେ ସମ୍ପୃକ୍ତ ଅନୁଷ୍ଠାନର କର୍ମକର୍ତ୍ତା ଏନେଇ କିଛି ମୁହଁ ଖୋଲୁ ନାହାଁନ୍ତି । ଏହା ପରେ ସମ୍ପର୍କୀୟ ପାଟିତୁଣ୍ଡ କରିବାରୁ ପୋଲିସକୁ ଖବର ଦିଆଯାଇଥିବା କହିଛନ୍ତି ଅନୁଷ୍ଠାନ । ଫଳରେ ନିରାଶ୍ରୟ ହୋଇ ଅତିରିକ୍ତ ଜିଲ୍ଲାପାଳଙ୍କୁ ଭେଟିଛନ୍ତି ସମ୍ପର୍କୀୟ ।

ସେପଟେ, ଘଟଣାର ତଦନ୍ତ କରି ତୁରନ୍ତ ରିପୋର୍ଟ ପ୍ରଦାନ କରିବାକୁ ଜିଲ୍ଲା ଶିଶୁ ସୁରକ୍ଷା ଅଧିକାରୀ ରଶ୍ମିତା କରନଙ୍କୁ ନିର୍ଦ୍ଦେଶ ଦେଇଛନ୍ତି ଅତିରିକ୍ତ ଜିଲ୍ଲାପାଳ ବସନ୍ତ କୁମାର ସାହୁ ।

ବାପ ମାଆ ଛେଉଣ୍ଡ ଛାତ୍ରୀ ଜଣକ କେଉଁ ଆଡେ ଗଲେ ତାହାର ଖବର ସଂସ୍ଥାଠାରେ ନାହିଁ । ତେଣୁ ତୁରନ୍ତ ତଦନ୍ତ କରି ଝିଅକୁ ଫେରାଯାଉ । ଏଥିସହିତ ଝିଅକୁ ବିକ୍ରି କରିଦେଇଥିବାର ମଧ୍ୟ ସେମାନେ ଅଭିଯୋଗ କରିଛନ୍ତି । ତେବେ ଘଟଣାରେ ଡିସିପିଓ କିଛି କହିବାକୁ ମନା କରିଦେଇଛନ୍ତି ।

କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ