କନ୍ଧମାଳର ବିଭିନ୍ନ ଜୁଆ ଆଡ୍ଡାରେ ଚଢାଉ: 15 ଗିରଫ, ନଗଦ ଟଙ୍କା ସମେତ ମୋବାଇଲ ଜବତ

ଦାରିଙ୍ଗବାଡି ଓ ବ୍ରାହ୍ମଣୀଗାଁ ଥାନା ଅଞ୍ଚଳରୁ ଚଢାଉ କରାଯାଇ 15 ଜଣଙ୍କୁ ଗିରଫ କରିଛି ଜିଲ୍ଲା ପୋଲିସ । ସେ ସମସ୍ତଙ୍କୁ କୋର୍ଟ ଚାଲାଣ କରାଯାଇଛି ।

ଫୁଲବାଣୀ: ଆକ୍ସନ ମୁଡରେ ଜିଲ୍ଲା ପୋଲିସ । ଏସପି ପ୍ରତୀକ ସିଂଙ୍କ ନିର୍ଦ୍ଦେଶ ପରେ ଜିଲ୍ଲାର ବିଭିନ୍ନ ଜୁଆ ଆଡ୍ଡାରେ ଚଢାଉ କରାଯାଉଛି । ତେବେ ଦାରିଙ୍ଗବାଡି ଓ ବ୍ରାହ୍ମଣୀଗାଁ ଥାନା ଅଞ୍ଚଳରୁ ଚଢାଉ କରାଯାଇ 15 ଜଣଙ୍କୁ ଗିରଫ କରିଛି ଜିଲ୍ଲା ପୋଲିସ । ସେ ସମସ୍ତଙ୍କୁ କୋର୍ଟ ଚାଲାଣ କରାଯାଇଛି ।

ସୂଚନା ଅନୁଯାଇ, ଦାରିଙ୍ଗବାଡି ସୀମନବାଡି ଗାଁର ଏକ ଜୁଆ ଆଡ୍ଡା ଉପରେ ପୋଲିସ ହଠାତ୍‌ ଚଢାଉ କରି 11ଜଣଙ୍କୁ ଗିରଫ କରିବା ସହିତ 15ହଜାର 200 ଟଙ୍କା ଜବତ କରିଛି । ଏହା ସହିତ 4ଟି ମୋବାଇଲ ଓ ଅନ୍ୟାନ୍ୟ ଜିନିଷ ଜବତ କରାଯାଇଛି ବୋଲି କହିଛନ୍ତି ଥାନା ଅଧିକାରୀ କୌଶିକ ମାଝି । ସେହିପରି ବ୍ରାହ୍ମଣୀଗାଁ ଥାନା ଅଞ୍ଚଳରୁ ପୋଲିସ୍ ଚଢାଉ କରି 4 ଜଣଙ୍କୁ ଗିରଫ କରିବା ସହିତ 11ହଜାର 200 ଟଙ୍କା, ଦୁଇଟି କାର ଓ ତିନୋଟି ବାଇକ୍ ଜବତ କରାଯାଇଛି ।

କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ