ଫୁଲବାଣୀ: କନ୍ଧମାଳରେ ଜିଲ୍ଲାସ୍ତରୀୟ ଆନ୍ତର୍ଜାତୀୟ ମହିଳା ଦିବସ ଫୁଲବାଣୀରେ ପାଳିତ ହୋଇଯାଇଛି । ଶୋଭାଯାତ୍ରା, ଜନସଭା ମାଧ୍ୟମରେ ମହିଳାମାନେ ପାଳିଛନ୍ତି ଏହି ଦିବସ ଏବଂ ସଚେତନ ହୋଇଛନ୍ତି ନିଜ ଅଧିକାର, ଦାୟିତ୍ୱ, କର୍ତ୍ତବ୍ୟ ଓ ନିଜ ସାମର୍ଥ୍ୟ ସମ୍ପର୍କରେ ।
କନ୍ଧମାଳରେ ଆନ୍ତର୍ଜାତୀୟ ମହିଳା ଦିବସ ପାଳିତ ଫୁଲବାଣୀର ବିଭିନ୍ନ ସ୍ଥାନରେ ରବିବାର ଆନ୍ତର୍ଜାତୀୟ ମହିଳା ଦିବସ ପାଳିତ ହୋଇଯାଇଛି । ଗାନ୍ଧୀ ଛକ ଠାରୁ ମହିଳା ମାନେ ଏକ ଶୋଭାଯାତ୍ରାରେ ବାହାରି ସହର ପରିକ୍ରମା କରିଥିଲେ । କର୍ମଜୀବୀ ମହିଳାଙ୍କ ଅଗ୍ରଣୀ ସଂଗଠନ ଜୋଲା ସୋସାଇଟି, ଜିଲ୍ଲା ଆଇନ ସେବା ପ୍ରାଧିକରଣ, ଜିଲ୍ଲା ବିକାଶ ମଞ୍ଚ ପ୍ରମୁଖ ସଂଗଠନ ପାଳନ କରିଥିଲେ ଏହି ଦିବସ ।
ଜିଲ୍ଲାପାଳଙ୍କ ସଦ୍ଭାବନା କକ୍ଷରେ ସଭା ଆୟୋଜନ କରାଯାଇଥିଲା । ସେହିପରି ଫୁଲବାଣୀ ଜିଲ୍ଲା ଆଇନ ସେବା ପ୍ରାଧିକରଣ କକ୍ଷରେ ସଭା ସମିତି ମାଧ୍ୟମରେ ସଚେତନ କରାଯାଇଥିଲା ମହିଳାଙ୍କ ପାଇଁ ଥିବା ଆଇନ ସମ୍ପର୍କରେ । ସଫଳ ମହିଳାଙ୍କ ସମ୍ପର୍କରେ ଆଲୋଚନା କରାଯାଇ ସମସ୍ତେ ପ୍ରେରଣା ନେବାକୁ ଆହ୍ୱାନ ଦେଇଥିଲେ ବକ୍ତା।
କନ୍ଧମାଳରୁ ସଦାଶିଵ ପାତ୍ର,ଈଟିଭି ଭାରତ
