କନ୍ଧମାଳ: ଜିଲ୍ଲା ଦାରିଙ୍ଗବାଡି ଥାନା ଅନ୍ତର୍ଗତ କଟାବାଡି ଗାଁରେ ଚାଞ୍ଚଲ୍ୟକର ଘଟଣା। ପୂର୍ବ ଶତ୍ରୁତାକୁ କେନ୍ଦ୍ର କରି 8 ବର୍ଷର ଶିଶୁକୁ ଅତ୍ୟନ୍ତ ନିର୍ମମ ହତ୍ୟା କଲେ ଦୁଇ ହତ୍ୟାକାରୀ । ପ୍ରାୟ 3 ଦିନ ଧରି ନିଖୋଜ ଥିବା ଉକ୍ତ ଗାଁର ରିତେଶର ଗଳିତ ମୃତଦେହକୁ ଉଦ୍ଧାର କରିଛି ଦାରିଙ୍ଗବାଡି ପୋଲିସ ।
ଭିଡିଓ ସୌଜନ୍ୟ: ସମ୍ବାଦଦାତା, କନ୍ଧମାଳ ସୂଚନାଯୋଗ୍ୟ, ଗତ ରବିବାର ଠାରୁ ଦାରିଙ୍ଗବାଡି ଥାନା ଅନ୍ତର୍ଗତ ପର୍ତ୍ତମାହା ପଞ୍ଚାୟତର କଟାବାଡି ଗ୍ରାମର ତୃତୀୟ ଶ୍ରେଣୀ ଛାତ୍ର ରିତେଶ ନିଖୋଜ ଥିଲା । ପରିବାର ଲୋକେ ବହୁ ଖୋଜାଖୋଜି କରିଥିଲେ ମଧ୍ୟ ରିତେଶର କୌଣସି ସୁରକ ମିଳି ପାରିନଥିଲା । ଫଳରେ ପରିବାର ଲୋକେ ସ୍ଥାନୀୟ ଦାରିଙ୍ଗବାଡି ଥାନାରେ ମାମଲା ରୁଜୁ କରିଥିଲେ ।
ପୋଲିସ ତଦନ୍ତ ପରେ ଉକ୍ତ ଗ୍ରାମର 2 ଜଣ ବ୍ୟକ୍ତି ମୀନକେତନ ପ୍ରଧାନ ଓ ସାମସଙ୍ଗ ପ୍ରଧାନକୁ ଅଟକ ରଖି ପଚରାଉଚରା ପରେ ସମ୍ପୂର୍ଣ୍ଣ ଘଟଣାଟି ଜଣାପଡିଥିଲା । ସେମାନେ ହିଁ ରିତେଶକୁ ପ୍ରଥମେ ଗାଁରୁ ଉଠେଇ ନେଇଥିବା ବେଳେ ନିକଟସ୍ଥ ପାହାଡରେ ଗଳା ଚିପି ହତ୍ୟା କରିଥିଲେ। ଏହାପରେ ପାହାଡରେ ପୋତି ଦେଇଥିବା ନେଇ ସ୍ୱୀକାର କରିଛନ୍ତି ଏହି ଦୁଇ ଅଭିଯୁକ୍ତ। ରୀତେଶର ମୃତଦେହକୁ ପୋଲିସ ଉଦ୍ଧାର କରିଥିବା ବେଳେ ଶବ ବ୍ୟବଚ୍ଛେଦ ପାଇଁ ବ୍ରହ୍ମପୁର ମେଡିକାଲକୁ ପଠାଇଦେଇଛି।
ମୃତକଙ୍କ ବାପା ଅଟୋ ଚାଳକ। ଅଭିଯୁକ୍ତଙ୍କୁ ଅଟୋଚାଳନା ନ ଶିଖାଇବା ଏବଂ ଜମିଜମାକୁ କେନ୍ଦ୍ର କରି ଏଭଳି ବିଭତ୍ସ କାଣ୍ଡ ଭିଆଇଛନ୍ତି ବୋଲି ଥାନା ଅଧିକାରୀ ଅଲେଖ ଗରଡିଆ କହିଛନ୍ତି। ହତ୍ୟା,ପ୍ରମାଣ ନଷ୍ଟ ଏବଂ ଅପରାଧିକ ଷଡଯନ୍ତ୍ର ଦଫାରେ ଗିରଫ କରାଯାଇଛି ବୋଲି ଥାନା ଅଧିକାରୀ ସୂଚନା ଦେଇଛନ୍ତି।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
