ଭବାନୀପାଟଣା: ସହର ପାଲଟିଲାଣି ଗାଈ ଗୁହାଳ । ଯୁଆଡେ ଦେଖିଲେ ବୁଲୁଛନ୍ତି ଗାଈ ପଲ । ଦିନ ତ ଦିନ ସନ୍ଧ୍ୟା ହେଲେ ଏହି ବୁଲା ଗୋରୁ ଗାଈ ଭିଡ଼ ବଢି ଯାଉଛି ଯାହା ଏବେ ସମସ୍ୟା ଭାବେ ଛିଡା ହୋଇଛି । ସହର ଭିତରେ ଥିବା ମୁଖ୍ୟ ଗାନ୍ଧୀ ଛକ, ମାଣିକେଶ୍ଵରୀ ଛକ, ଗାନ୍ଧୀ ମାର୍ଗ, ଜେଲଖାନା ଛକ, କଲେଜ ଛକ ଓ ଷ୍ଟେସନ ରୋଡ଼ ଆଦି ସ୍ଥାନରେ ଶହ ଶହ ଗାଈଗୋରୁ ଶୋଇ ରହୁଥିବା ଦେଖିବାକୁ ମିଳୁଛି ।
ସହରରେ ନାହିଁ କାଞ୍ଜିଆ ହୁଦା, ରାସ୍ତାରେ ବୁଲୁଛନ୍ତି ଗାଈ ପଲ ଏହି ସବୁ ଛକ ଗୁଡିକ ସହରର ମୁଖ୍ୟ ତଥା ଜନ ଗହଳି ପୂର୍ଣ୍ଣ ସ୍ଥାନ ହୋଇଥିବାରୁ ଦୈନିକ ଶହଶହ ଲୋକ ଯାତାୟତ କରନ୍ତି । ବହୁ ସଂଖ୍ୟାରେ ଗାଡି ମୋଟର ଚଳାଚଳ ହୁଏ । କିନ୍ତୁ ଦିନରାତି ଗାଈଗୋରୁ ଛକ ଗୁଡିକୁ କବ୍ଜା କରି ରଖୁଥିବାରୁ ଯାତାୟତରେ ଅସୁବିଧା ହେଉଛି । ଆଉ ଏନେଇ ଅନେକ ସମୟରେ ବି ଦୁର୍ଘଟଣା ଘଟୁଛି । ଫଳରେ ଉଭୟ ମଣିଷ ଓ ଗାଈଗୋରୁଙ୍କ ଜୀବନ ଯାଉଛି ।
ଗାଈଗୋରୁ ପାଳନ କରିଥିବା ସହରାଞ୍ଚଳର ଲୋକେ ନିଜ ନିଜ ଗାଈଗୋରୁ ଗୁହାଳରେ ରଖିବା ବଦଳରେ ବାହାରକୁ ଛାଡି ଦେଉଛନ୍ତି । ସେମାନଙ୍କ ପାଇଁ କୌଣସି କଟକଣା ଜାରି କରା ଯାଉନାହିଁ । ଫଳରେ ଗାଈପଲ କେବଳ ଯେ ସହର ଭିତରେ ଏଭଳି ସମସ୍ୟା ସୃଷ୍ଟି କରୁଛନ୍ତି ତାହା ନୁହେଁ ବରଂ ୨୬ ନମ୍ବର ଜାତୀୟ ରାଜପଥ ଉପରେ ମଧ୍ୟ ଶୋଇ ରହୁଛନ୍ତି । ଫଳରେ ପ୍ରତ୍ୟେକ ଦିନ ଦୁର୍ଘଟଣା ଘଟି କେତେବେଳେ ଗାଈଗୋରୁଙ୍କ ଜୀବନ ଯାଉଛି ତ ଆଉ କେତେବେଳେ ମଣିଷର ମଧ୍ୟ ଜୀବନ ହାନି ହେଉଛି । ଅନେକ ସମୟରେ ସହରାଞ୍ଚଳର ଏହି ବୁଲା ଗାଈଗୋରୁ ଆଖ ପାଖ ଗ୍ରାମଞ୍ଚଳକୁ ଯାଇ ବ୍ୟାପକ ଫସଲ ମଧ୍ୟ ନଷ୍ଟ କରୁଛନ୍ତି । ଏନେଇ ଚାଷୀମାନେ ମଧ୍ୟ ପ୍ରଶାସନକୁ ବହୁବାର ଗୁହାରି କରୁଛନ୍ତି । କିନ୍ତୁ ଭବାନୀପାଟଣା ସହରରେ ବୁଲା ଗାଈଗୋରୁ ନିୟନ୍ତ୍ରଣ କରିବାକୁ କୌଣସି ପ୍ରକାର ଉଦ୍ୟମ ହେଉ ନାହିଁ ।
ଏଠାରେ କାଞ୍ଜିଆ ହୁଦା ନଥିବାରୁ ତାହା ସମ୍ଭବ ହୋଇ ପାରୁ ନାହିଁ । ଭବାନୀପାଟଣା ପୌର ପରିଷଦର ନିଜସ୍ବ କାଞ୍ଜିଆ ହୁଦା ନଥିବା ନିଶ୍ଚିତ ଭାବେ ସରକାରୀ ଉଦାସୀନତାର ନମୁନା । ଏହାଛଡା କଟକଣାକୁ ଖାତିରି ନକରି ମନ ଇଚ୍ଛା ଗାଈଗୋରୁ ବାହାରକୁ ଛାଡି ଦେଉଥିବା ଲୋକଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଉ ନଥିବା ମଧ୍ୟ ପୌର କର୍ତ୍ତୃପକ୍ଷଙ୍କ ଅବହେଳା ବୋଲି ଅଭିଯୋଗ ହେଉଛି।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
