ଭବାନୀପାଟଣା: କଳାହାଣ୍ଡି ରାୟଗଡା ଜିଲ୍ଲା ସୀମାନ୍ତ ନିୟମଗିରି ପର୍ବତରେ ବସବାସ କରୁଥିବା ଆଦିମ ଜନଜାତିଙ୍କ ମଧ୍ୟରେ ପ୍ରଥମ ଥର ଚିହ୍ନଟ ହୋଇଛି କୋରୋନା । ଗତକାଲି ସନ୍ଧ୍ୟାରେ ଲାଞ୍ଜିଗଡ଼ ବ୍ଲକ ତ୍ରିଲୋଚନପୁର ପଞ୍ଚାୟତ ଆମଠାପଦର ଗାଁରେ ତିନି ଜଣ ବ୍ୟକ୍ତି କୋରୋନା ଆକ୍ରାନ୍ତ ଚିହ୍ନଟ ହୋଇଥିବା ଲାଞ୍ଜିଗଡ଼ ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ମିଳିଛି । ଏଥି ମଧ୍ୟରୁ ଜଣେ ବୟସ୍କ ବ୍ୟକ୍ତି, ଜଣେ ଯୁବକ ଓ ଗୋଟିଏ ଚାରି ବର୍ଷର ଶିଶୁଙ୍କଠାରେ କୋରୋନା ପଜିଟିଭ୍ ଚିହ୍ନଟ ହୋଇଥିବା ଜଣାପଡ଼ିଛି ।
ଗତକାଲି ସନ୍ଧ୍ୟାରେ ସ୍ୱାସ୍ଥ୍ୟ ବିଭାଗର ଏକ ଟିମ୍ ଆମଠାପଦର ଗାଁକୁ ଯାଇ ଲକ୍ଷଣ ଥିବା ଲୋକଙ୍କ ଆଣ୍ଟିଜେନ୍ କିଟ୍ ସାହାଯ୍ୟରେ ପରୀକ୍ଷା କରିଥିଲେ । ସେଥିମଧ୍ୟରୁ ତିନିଜଣ କରୋନା ପଜିଟିଭ୍ ଚିହ୍ନଟ ପରେ ଲାଞ୍ଜିଗଡ଼ ମେଡ଼ିକାଲ ଅଫିସର ଭବାନୀଶଙ୍କର ଲେଙ୍କାଙ୍କ ନେତୃତ୍ୱରେ ଡା. ନରେନ୍ଦ୍ର ଦାସଙ୍କ ସହିତ ଏକ ସ୍ୱାସ୍ଥ୍ୟ ଟିମ୍ ଆମଠାପଦର ଗାଁରେ ପହଞ୍ଚି ତିନିଜଣ ଆକ୍ରାନ୍ତଙ୍କୁ ସ୍ୱାସ୍ଥ୍ୟସେବା ଯୋଗାଇ ଦେଇଥିଲେ । ବର୍ତ୍ତମାନ ତିନିଜଣ ଆକ୍ରାନ୍ତଙ୍କ ସ୍ୱାସ୍ଥ୍ୟବସ୍ଥା ସ୍ଥିର ଥିବା ନେଇ ସ୍ୱାସ୍ଥ୍ୟ ବିଭାଗ ପକ୍ଷରୁ ଜଣାପଡ଼ିଛି ।
ଜିଲ୍ଲାର ନିୟମଗିରି ପାହାଡ ତଥା ଚାରିପାର୍ଶ୍ବରେ ବସବାସ କରୁଥିବା ଆଦିମ ଜନଜାତିଙ୍କଠାରେ କୋରୋନା ପଜିଟିଭ୍ ଥିବା ଜଣା ପଡିଥିଲା । ଏହାକୁ ଦୃଷ୍ଟିରେ ରଖି କଳାହାଣ୍ଡି ଜିଲ୍ଲା ପ୍ରଶାସନ ନିର୍ଦ୍ଦେଶ କ୍ରମେ ଲାଞ୍ଜିଗଡ଼ ବ୍ଲକ ପ୍ରଶାସନ ପକ୍ଷରୁ ଲାଞ୍ଜିଗଡ଼ ବ୍ଲକର ଆଦିମ ଜନଜାତିଙ୍କ ସୁରକ୍ଷା ପାଇଁ ଗତ ବୁଧବାର ୧୯ ତାରିଖ ଦିନ ଠାରୁ ଆରମ୍ଭ ହୋଇଥିଲା ଡୋର ଟୁ ଡୋର ସର୍ଭେ ।