କଳାହାଣ୍ଡି: ଆସିଛି ପାର୍ବଣ ଋତୁ । ଧରାବତରଣ କରିଛନ୍ତି ଜଗତ ଜନନୀ ମା' ଦୁର୍ଗା । ଏନେଇ ଚାରିଆଡେ ଆରମ୍ଭ ହେଲାଣି ଉତ୍ସବର ମାହୋଲ । ଚଳିତ ବର୍ଷ କଟକଣା ମୁକ୍ତ ଦୁର୍ଗା ପୂଜା ହେଉଥିବାବାରୁ ଚଳଚଞ୍ଚଳ ହୋଇଉଠିଛି ଭବାନୀପାଟଣା ସହର । ପୂଜା କମିଟି ପକ୍ଷରୁ ସମସ୍ତ ପ୍ରକାର ବ୍ୟବସ୍ଥା କରାଯାଇଛି । ଆକର୍ଷଣୀୟ ମେଢ ସାଙ୍ଗକୁ ସୁସଜ୍ଜିତ ତୋରଣ ଓ ଆଖି ଝଲସା ଆଲୋକମାଳାରେ ନବବଧୂ ପରି ସଜେଇ ହୋଇଛି ଭବାନୀପାଟଣା ସହର । ଚଳିତ ବର୍ଷ ନକଟିଗୁଡା ପୂଜା କମିଟି ପକ୍ଷରୁ ପ୍ରଦର୍ଶିତ ହୋଇଛି ରାଷ୍ଟ୍ରପତି ଭବନ ।
ଚଳିତ ବର୍ଷ ଭବାନୀପାଟଣା ସହରର ବିବିସିପଡା ପୂଜା କମିଟି, ଜନତା ପୂଜା କମିଟି, ପ୍ରଦେଶୀପଡା ପୂଜା କମିଟି ଓ ନକଟିଗୁଡା ପୂଜା କମିଟି ଭଳି ଛୋଟ ବଡ ୧୦ଟି ପୂଜା ମଣ୍ଡପରେ ପ୍ରସ୍ତୁତ ହୋଇଛି ଆକର୍ଷଣୀୟ ମେଢ ଓ ତୋରଣ । ଏଥିସହ ମା'ଙ୍କର ଜୀବନ୍ତ ପ୍ରାୟ ମୂର୍ତ୍ତିକୁ ପୂଜାର୍ଚ୍ଚନା କରାଯାଉଛି । ଏଥିସହ ସୁସଜ୍ଜିତ ଆଲୋକମାଳାରେ ଝଲସି ଉଠୁଛି ସାରା ଭବାନୀପାଟଣା ସହର । ଏସବୁ ଭିତରେ ଶ୍ରଦ୍ଧାଳୁ ଓ ଦର୍ଶକମାନଙ୍କ ପାଇଁ ମୀନାବଜାର ଓ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମର ମଧ୍ୟ ଆୟୋଜନ କରାଯାଇଛି ।
ତେବେ ଏନେଇ ପୂଜା କମିଟି ପକ୍ଷରୁ ୭ ଦିନବ୍ୟାପୀ ମନୋରଞ୍ଜନ ପାଇଁ ମେଲୋଡି, ମୀନା ବଜାର ଓ ଭଜନ ସନ୍ଧ୍ୟାର ଆୟୋଜନ କରାଯାଇଛି । ଏ ସବୁକୁ ନେଇ କମିଟିର କର୍ମକର୍ତ୍ତା ମଧ୍ୟ ବେଶ ଉତ୍ସାହିତ । କାରଣ ଗତ ଦୁଇବର୍ଷ କୋଭିଡ କଟକଣା କାରଣରୁ ବିନା ଭକ୍ତରେ ପୂଜା ଅନୁଷ୍ଠିତ ହୋଇଥିଲା । ସୀମିତ ସଂଖ୍ୟକ ସଦସ୍ୟଙ୍କ ଅଂଶଗ୍ରହଣରେ କେବଳ ନୀତିକାନ୍ତି ରକ୍ଷା ହୋଇଥିଲା । ମାତ୍ର ଚଳିତ ଥର କଟକଣା ମୁକ୍ତ ପୂଜାକୁ ଅନୁମତି ମିଳିଥିବାରୁ ବିଭିନ୍ନ ପୂଜା ମଣ୍ଡପରେ ଭକ୍ତଙ୍କ ଅସମ୍ଭାଳ ଭିଡ଼ ଦେଖିବାକୁ ମିଳୁଛି ।