ଭବାନୀପାଟଣା:ସରୁନି ଚଷା ପୁଅର ଦୁଃଖ । ଆଷାଢ ସରି ଶ୍ରାବଣ ସାରିବାକୁ ବସିଲାଣି । କିନ୍ତୁ ଧାନ ଚାଷ ଲାଗି ଏବେବି ହନ୍ତସନ୍ତ ହେଉଛି ଚାଷୀ । ପାଣି ଅଭାବରୁ ଧାନ କ୍ଷେତ ଫାଟି ଆଁ କରିଛି । ବୁଣା ଯାଇଥିବା ବିହନ ସହ ତଳି ଧାନ ବି ମରିବାକୁ ବସିଲାଣି । ଫଳରେ ଅନେକ ଚାଷ ଜମିରେ ଗୋରୁଗାଈ ଚାରୁଥିବାର ଦୃଶ୍ୟ ଦେଖିବାକୁ ମିଳୁଛି । କଳାହାଣ୍ଡିରେ ମରୁଡିର ପଦଧ୍ୱନୀ ଏବେ ଠାରୁ ଦେଖିବାକୁ ମିଳୁଛି ।
କଳାହାଣ୍ଡିରେ ମରୁଡିର ପଦଧ୍ୱନୀ
ଜିଲ୍ଲାର ସଦର ବ୍ଲକ ଅଞ୍ଚଳର ଅନେକ ସ୍ଥାନରେ ବୁଣାଧାନ ସବୁ ସଳଖିବା ବେଳକୁ ବର୍ଷାଭାବ ଯୋଗୁଁ ସେସବୁ ଝାଉଁଳି ମରି ଗଲାଣି ।ବର୍ଷାଭାବ ଯୋଗୁଁ ଚାଷ ଜମି ଫାଟି ଆଁ କରିଛି । ଫଳରେ ଚାଷୀ ମୁଣ୍ଡରେ ପଡିଛି ଚଡକ । ବିଭିନ୍ନ ବ୍ୟାଙ୍କ ଓ ମହାଜନଙ୍କ ଠାରୁ ଋଣ କରି ଚାଷ କରିଥିବା ଚାଷୀ ଏବେ ଚିନ୍ତାରେ । କିପରି ପରିଶୋଧ କରିବ ଋଣ ସେନେଇ ଭାଙ୍ଗି ପଡିଛି । ମୁଣ୍ଡର ଝାଳ ତୁଣ୍ଡରେ ମାରି ପେଟ ପାଇଁ ଦାନା ଉପାର୍ଜନ କରୁଥିବା ଚାଷୀ ମୁଣ୍ଡରେ ଏବେ ଋଣ ପରିଶୋଧର ବୋଝ ।