କଳାହାଣ୍ଡିରେ ଉଦଘାଟିତ ହେଲା ବୁଢା ଡଙ୍ଗର ଲୋକ ମହୋତ୍ସବ

ଦୁଇବର୍ଷର କୋରୋନା କଟକଣା ପରେ କଳାହାଣ୍ଡି ଜିଲ୍ଲାରେ ଆୟୋଜିତ ହେଲା ବୁଢା ଡଙ୍ଗର ଲୋକ ମହୋତ୍ସବ । ଘୁମୁରା, ବଜାଶାଲ ନୃତ୍ୟୁରେ ଦୁଲୁକିଲା ମଞ୍ଚ । ଅଧିକ ପଢନ୍ତୁ

ଭବାନୀପାଟଣା:କଳାହାଣ୍ଡି ଜିଲ୍ଲାର କଳା, ସଂସ୍କୃତି, ଐତିହ୍ୟ ଓ ବିକାଶଧାରାର ବାର୍ତ୍ତାବହ ''୨୭ତମ ବୁଢା ଡଙ୍ଗର ଲୋକ ମହୋତ୍ସବ ୨୦୨୨'' ଉଦଘାଟିତ ହୋଇଯାଇଛି । କେସିଙ୍ଗା ସ୍ଥିତ ଜଗନ୍ନାଥ ପଡିଆ ଠାରେ ଅନୁଷ୍ଠିତ ହୋଇଛି ଏହି ମହୋତ୍ସବ । କୋଭିଡ ମହାମାରୀ ଯୋଗୁଁ ଦୁଇ ବର୍ଷ ପରେ ଏହି ମହୋତ୍ସବ ହେଉଥିବାରୁ ଏହାକୁ ନେଇ କଳାହାଣ୍ଡି ଜିଲ୍ଲାର ଗାଁ ଠାରୁ ସହର ସବୁଠୁ ଉତ୍ସାହ ଦେଖିବାକୁ ମିଳିଛି । ଦୁଇ ଦିନ ଧରି ଏହି ଲୋକ ମହୋତ୍ସବ ଚାଲିବ ।

ପ୍ରଥମ ଦିନରେ ମୁଖ୍ୟ ଅତିଥି ଭାବରେ ନବରଙ୍ଗପୁର ଲୋକସଭା ସାଂସଦ ରମେଶ ମାଝୀ, ସମ୍ମାନିତ ଅତିଥି ଭାବରେ କଳାହାଣ୍ଡି ବିଶ୍ୱ ବିଦ୍ୟାଳୟ କୁଳପତି ସଂଜୟ ଶତପଥି ପ୍ରମୁଖ ଯୋଗ ଦେଇ ଏହାର ଉଦଘାଟନ କରିଥିଲେ । ଏହି ପରିପ୍ରେକ୍ଷୀରେ ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ କାମ କରିଥିବା ବ୍ୟକ୍ତି ବିଶେଷମାନଙ୍କୁ ସମ୍ବର୍ଦ୍ଧିତ କରାଯାଇଥିଲା । ଏହାପରେ ସାଂସ୍କୃତିକ କାର୍ଯ୍ୟକ୍ରମ ଆରମ୍ଭ ହୋଇଥିଲା । ଭୁବନେଶ୍ୱର କଳାକାରମାନଙ୍କ ଦ୍ୱାରା ଜଗନ୍ନାଥ ସଂସ୍କୃତି ଓ ପରମ୍ପରାକୁ ନେଇ ଦେବଦାସୀ ନୃତ୍ୟ ଓଡିଶୀରୁ ଆରମ୍ଭ ହୋଇଥିଲା ସାଂସ୍କୃତିକ ସନ୍ଧ୍ୟା । ଆସାମର ବିହୁ ନୃତ୍ୟ, ବରଗଡ଼ର ବଜାଶାଲ ନୃତ୍ୟ ସହ କଳାହାଣ୍ଡିର ବିର ବାଦ୍ୟ ଘୁମୁରା ନୃତ୍ୟରେ ଦୁଲୁକି ଉଠିଥିଲା ବୁଢା ଡଙ୍ଗର ଲୋକ ମହୋତ୍ସବ ମଞ୍ଚ । ଶୀତୁଆ ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଭରପୁର ମଜା ଉଠାଇଲେ ଦର୍ଶକ ।

ଇଟିଭି ଭାରତ, କଳାହାଣ୍ଡି