ଭବାନୀପାଟଣା: କଳାହାଣ୍ଡିରେ କ୍ରାଇମ କଣ୍ଟ୍ରୋଲ ବ୍ୟୁରୋର ଚଢ଼ାଉ ଜାରି । ଗିରଫ ଅଭିଯୁକ୍ତଙ୍କ ସଂଖ୍ୟା ୭କୁ ବୃଦ୍ଧି । ଓ୍ବାଇଲ୍ଡ ଲାଇଫ କ୍ରାଇମ୍ କଣ୍ଟ୍ରୋଲ ବ୍ୟୁରୋ ସ୍କାନରରେ ଏବେ କଳାହାଣ୍ଡି ଜିଲ୍ଲା । ଗୁଇନ୍ଦା ତଥ୍ୟ ଆଧାରରେ ଗତ ଶୁକ୍ରବାର ଠାରୁ ଜିଲ୍ଲାରେ ଚାଲିଛି ତଦନ୍ତ । ସ୍ବତନ୍ତ୍ର ଟିମର ଏହି ୪୮ ଘଣ୍ଟିଆ ତଦନ୍ତରେ ବର୍ତ୍ତମାନ ସୁଦ୍ଧା ୯ଟି ବାଘ ଛାଲ, ନଖ ଓ ଦାନ୍ତ ଜବତ ହୋଇଥିବା ବେଳେ ବଢୁଛି ବାଘଛାଲ ତସ୍କରୀ ମାମଲାରେ ସମ୍ପୃକ୍ତ ଥିବା ଅଭିଯୁକ୍ତଙ୍କ ସଂଖ୍ୟା ।
ବାଘ ଛାଲ ତସ୍କରୀ
ଶୁକ୍ରବାର ବିଳମ୍ବିତ ରାତିରେ ଗୁଇନ୍ଦା ତଥ୍ୟକୁ ଆଧାର କରି ପ୍ରଥମେ ଜିଲ୍ଲାର ଜୁନାଗଡ଼ ଓ ନର୍ଲା ରେଞ୍ଜରେ ଜାଲ ବିଛାଇଥିଲା ଏହି ସ୍ବତନ୍ତ୍ର ଟିମ । ଗ୍ରାହକ ସାଜି ବାଘଛାଲ କାରବାର ସମୟରେ ଜବତ ହୋଇଥିଲା ୫ଟି ବାଘଛାଲ ନଖ, ଦାନ୍ତ ଓ ଗିରଫ ହୋଇଥିଲେ ୬ ଅଭିଯୁକ୍ତ । ଗିରଫ ଅଭିଯୁକ୍ତଙ୍କ ତଥ୍ୟ ଆଧାରରେ ପୁଣି ଶନିବାର ଚଢ଼ାଉ ହୋଇଥିଲା ଜିଲ୍ଲାର ନର୍ଲା ରେଞ୍ଜ ଅଞ୍ଚଳରେ । ଆଉ ଜବତ ହୋଇଥିଲା ୪ଟି ବାଘଛାଲ ଆଉ ଗିରଫ ହୋଇଛି ଜଣେ ଅଭିଯୁକ୍ତ ।