ସ୍କୁଲରେ ବାଜିଲା ୱାଟର ବେଲ, ପିଲାଙ୍କୁ ବଣ୍ଟାହେଲା ବୋତଲ

ଝାରସୁଗୁଡା ମନମୋହନ ଏମଇ ସ୍କୁଲରେ ଆଜିଠୁ ପାଣି ପିଇବାକୁ ୱାଟର ବେଲ ଆରମ୍ଭ ହୋଇଛି । ଏହାସହ ପ୍ରତ୍ୟେକ ଛାତ୍ରଛାତ୍ରୀଙ୍କୁ ପାଣି ବୋତଲ ଓ ଘଣ୍ଟି ମଧ୍ୟ ଦିଆଯାଇଛି । 16 ତାରିଖରୁ ସବୁ ସ୍କୁଲରେ ଏହି ନିୟମ ଲାଗୁହେବ ବୋଲି ଜିଲ୍ଲା ଶିକ୍ଷାଧିକାରୀ କହିଛନ୍ତି ।

ଝାରସୁଗୁଡା: ସ୍କୁଲରେ ପାଣି ପିଇବାକୁ ବାଜିଲା ଘଣ୍ଟି। ପୂର୍ବରୁ ଝାରସୁଗୁଡାର ଜୟଲ୍ୟାଣ୍ଡ ପ୍ରାଥମିକ ବିଦ୍ୟାଳୟରେ ଏହି ଯୋଜନା ଆରମ୍ଭ ହୋଇଥିବାବେଳେ ଆଜିଠୁ ପରୀକ୍ଷାମୂଳକ ଭାବରେ ପୌରାଞ୍ଚଳରେ ଏହି ଯୋଜନା ଆରମ୍ଭ ହୋଇଛି ।

ଆଜି ଦିନ 11ଟା 15 ମିନିଟ୍‌ରେ ପ୍ରଥମ ଘଣ୍ଟି ମନମୋହନ ଏମଇ ସ୍କୁଲରେ ବଜାଇ ଆରମ୍ଭ ହୋଇଛି ଏହି ଯୋଜନା । ଏଥିପାଇଁ ଜିଲ୍ଲା ପ୍ରଶାସନ ତରଫରୁ ସମସ୍ତ ଛାତ୍ରଛାତ୍ରୀଙ୍କୁ ପାଣି ବୋତଲ ମଧ୍ୟ ଯୋଗାଇ ଦିଆଯାଇଛି । କେବଳ ଏତିକି ନୁହେଁ ଏହାସହ ଏକ ଘଣ୍ଟି ମଧ୍ୟ ସ୍କୁଲକୁ ପ୍ରଦାନ କରାଯାଇଛି ।

ଆସନ୍ତା 16 ତାରିଖରୁ ଜିଲ୍ଲାର ସମସ୍ତ ସରକାରୀ ଓ ବେସରକାରୀ ସ୍କୁଲ ଗୁଡିକରେ ଏହି ସତର୍କ ଘଣ୍ଟି ବାଜିବ ବୋଲି ଜିଲ୍ଲାପାଳ ପ୍ରତିଶୃତି ଦେଇଛନ୍ତି । ଏହାସହ ସମସ୍ତ ସ୍କୁଲକୁ ପାଣି ବୋତଲ ମଧ୍ୟ ପ୍ରଦାନ କରାଯିବ ବୋଲି ଜିଲ୍ଲାପାଳ କହିଛନ୍ତି । ପାଠପଢା ଚାଲିଥିବାବେଳେ ଅନ୍ତତଃ ତିନି ଥର ପାଣି ପିଇବା ପାଇଁ ସତର୍କ ଘଣ୍ଟି ବା ୱାଟର ବେଲ ବାଜିବ ବୋଲି ଜିଲ୍ଲାଧିକାରୀ କହିଛନ୍ତି । ଏହାସହ ଏକ ଅଡିଟ ପ୍ରୋଗ୍ରାମ ମଧ୍ୟ ରହିବ, ଯେଉଁମାନେ ଏହି ନିୟମ ପ୍ରତ୍ୟେକ ସ୍କୁଲରେ ଲାଗୁ ହେଉଛି ନା ନାହିଁ ଏହା ଚେକ କରିବେ ।

ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ