ଝାରସୁଗୁଡା:ହାତରେ ଆଉ ମାତ୍ର ଗୋଟିଏ ଦିନ । ଝାରସୁଗୁଡା ଉପନିର୍ବାଚନ ପାଇଁ ମଝିରେ ଆଉ ଗୋଟିଏ ଦିନ ବାକି ରହିଛି । ଭୋଟରଙ୍କୁ ଆକୃଷ୍ଟ କରିବାକୁ 3 ଦଳର ପ୍ରାର୍ଥୀଙ୍କ ଜୋରଦାର ପ୍ରୟାସ ଜାରି ରହିଛି । ପ୍ରଚାର କରି ଘରକୁ ଘର ବୁଲି ଭୋଟ ମାଗୁଛନ୍ତି ପ୍ରାର୍ଥୀ । ଆଜି ପ୍ରଚାରର ଶେଷ ଦିନ । ସନ୍ଧ୍ୟାରେ ସରିବ ନର୍ବାଚନୀ ପ୍ରଚାର । ଆଜି ଶେଷ ଦିନ ଥିବାରୁ ପ୍ରଚାରକୁ ଜୋରଦାର କରିବେ 3 ରାଜନୈତିକ ଦଳର ପ୍ରାର୍ଥୀ । 10 ତାରିଖରେ ପରୀକ୍ଷା ଦେବେ 3 ପ୍ରାର୍ଥୀ । ଅନ୍ୟ ପଟେ ଝାରସୁଗୁଡା ଉପନିର୍ବାଚନ ଶେଷ ପର୍ଯ୍ୟାୟ ପ୍ରଚାରରେ ଗତକାଲି (ରବିବାର) ନବୀନ ବନାମ ଧର୍ମେନ୍ଦ୍ରଙ୍କ ହାଇଭୋଲଟେଜ ଟକ୍କରରେ କମ୍ପିଥିଲା ମୈଦାନ ।
ପ୍ରାର୍ଥୀଙ୍କ ପାଇଁ ଶୀର୍ଷ ନେତାଙ୍କ ଭୋଟ ଭିକ୍ଷା:କାହାର ହେବ ଝାରସୁଗୁଡା । ଝାରସୁରୁଗୁଡା ବ୍ୟାଟେଲ ପାଇଁ ପ୍ରଚାର ମୈଦାନକୁ ଓହ୍ଲାଇଥିଲେ ଦୁଇ ଦଳର ଶୀର୍ଷ ନେତା । ହେଭିୱେଟଙ୍କ ହାଇଭୋଲଟେଜ ପ୍ରଚାର ଟକ୍କରରେ କମ୍ପିଥିଲା ଝାରସୁଗୁଡା । ଶେଷ ପର୍ଯ୍ୟାୟ ପ୍ରଚାର ଲଢେଇରେ ଆଟାକ ଓ କାଉଣ୍ଟର ଆଟାକରେ ପରସ୍ପର ଉପରେ ବର୍ଷିଥିଲେ ଶାସକ ଦଳ ଓ ବିରୋଧୀ । ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗତକାଲି (ରବିବାର) ଝାରସୁଗୁଡା ଗସ୍ତ କରିଥିଲେ । ଅମଲିପାଲିରେ ଜନସଭାକୁ ସମ୍ବୋଧନ କରିବା ସହ ଦଳୀୟ ପ୍ରାର୍ଥୀ ଦୀପାଳି ଦାସଙ୍କୁ ଭୋଟ ଦେଇ ବିଜୟୀ କରିବାକୁ ଝାରସୁଗୁଡାବାସୀଙ୍କୁ ଭୋଟ ଭିକ୍ଷା କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଅନୁକମ୍ପା କାର୍ଡ ଓ ମହିଳାଙ୍କ ପ୍ରତି ଅସମ୍ମାନ ପ୍ରସଙ୍ଗ ଉଠାଇ ବିରୋଧୀଙ୍କୁ ଟାର୍ଗେଟ କରିଥିଲେ ବିଜେଡି ସୁପ୍ରିମୋ ।
ସେପଟେ ବିଜେପି ପ୍ରାର୍ଥୀ ଟଙ୍କଧର ତ୍ରିପାଠୀଙ୍କ ପାଇଁ ପ୍ରଚାର ମୈଦାନକୁ ଓହ୍ଲାଇଥିଲେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । କୋଲାବିରା ଧର୍ମେନ୍ଦ୍ର ପ୍ରଧାନଙ୍କ ପ୍ରଚାରରେ କମ୍ପିଥିଲା । ଉପନିର୍ବାଚନରେ ଟଙ୍କଧର ତ୍ରିପାଠୀଙ୍କ ପାଇଁ ଭୋଟ ଭିକ୍ଷା କରିଥିଲେ ଧର୍ମେନ୍ଦ୍ର । ରୋଡ ଶୋ ଓ ଜନସଭାକୁ ସମ୍ବୋଧନ କରିବା ସହ ରାଜ୍ୟ ସରକାରଙ୍କ ଉପରେ ବର୍ଷିଥିଲେ ଧର୍ମେନ୍ଦ୍ର ପ୍ରଧାନ । ଓଡିଶାର ଅସ୍ମିତା ଓ ଝାରସୁଗୁଡାର ସ୍ବାର୍ଥ ସୁରକ୍ଷିତ ପାଇଁ ବିଜେପିର ଲଢେଇ ଜାରି ରହିବ ବୋଲି କହିଥିଲେ ଧର୍ମେନ୍ଦ୍ର । ସେପଟେ ଦୁଇ ଦଳର ଏହି ଘମାଘୋଟ ପ୍ରଚାରକୁ ନେଇ କଂଗ୍ରେସ ଟାର୍ଗେଟ କରିଛି ।