ଝାରସୁଗୁଡା: ସ୍ବାସ୍ଥ୍ୟମନ୍ତ୍ରୀ ନବ ଦାସଙ୍କୁ ଗୁଳି କରି ହତ୍ୟା କରିବା ଘଟଣା । ଇତି ମଧ୍ୟରେ ୧୨ ଦିନ ବିତିଯାଇଥିଲେ ସୁଦ୍ଧା ରହସ୍ୟ ଉପରୁ ହଟିପାରୁନି ପରଦା । ଅଭିଯୁକ୍ତ ଗୋପାଳ ଗୁଳି କରିଥିବା ନେଇ ସ୍ବୀକାର କରିଥିବା ବେଳେ ପ୍ରକୃତ କାରଣ ଏ ଯାଏଁ ସ୍ପଷ୍ଟ ହୋଇପାରି ନାହିଁ । ତେଣୁ ବୁଧବାର କ୍ରାଇମବ୍ରାଞ୍ଚ ଟିମ ନାର୍କୋ ଓ ପଲିଗ୍ରାଫ ଟେଷ୍ଟ ପାଇଁ ଗୋପାଳକୁ ଗୁଜୁରାଟ ନେଇଛି । ସେଠାରେ କିଭଳି ଗୋପାଳ ମୁହଁରୁ ସତ ବାହାର କରାଯାଉଛି, ତାହାରି ଉପରେ ରାଜ୍ୟବାସୀଙ୍କ ନଜର ରହିଛି ।
ଏହା ମଧ୍ୟ ପଢନ୍ତୁ: ଗୁଜୁରାଟରେ ସତ ଓଗାଳିବ ଗୋପାଳ ! ଝାରସୁଗୁଡ଼ା ବିମାନବନ୍ଦରରେ ହସିଲା ଅଭିଯୁକ୍ତ
ଗୋପାଳଙ୍କୁ ମାରାଥନ ଜେରା ସତ୍ତ୍ବେ କୌଣସି ସୁଫଳ ମିଳୁନଥିବା ନେଇ ଜଣାପଡିଛି । ମାମଲାକୁ ନେଇ ସନ୍ଦେହ ବଢୁଥିବା ବେଳେ ଗୋପାଳଙ୍କ ନାର୍କୋ ଏବଂ ପଲିଗ୍ରାଫ ଟେଷ୍ଟ ପାଇଁ କ୍ରାଇମବ୍ରାଞ୍ଚ ଅନୁମତି ମାଗିଥିବା ବେଳେ ସବୁଜ ସଙ୍କେତ ଦେଇଥିଲେ ଝାରସୁଗୁଡା ଜେଏମଏଫସି କୋର୍ଟ । ଗୋପାଳ ମଧ୍ୟ ଏହି ଟେଷ୍ଟ କରିବା ପାଇଁ ସହମତି ପ୍ରକାଶ କରିବାରୁ କୋର୍ଟ ଆସନ୍ତା ୧୩ ତାରିଖ ଯାଏଁ ରିମାଣ୍ଡ ପ୍ରଦାନ କରିଛନ୍ତି ।
ହତ୍ୟା ମାମଲାର ଭାର କ୍ରାଇମବ୍ରାଞ୍ଚ ନେବା ପରେ ଅଦ୍ୟାବଧି ଗୋପାଳକୁ ୩ ଥର ରିମାଣ୍ଡରେ ଅଣାଯାଇଛି । ଗତ ୨୯ ତାରିଖ ମଧ୍ୟାହ୍ନରେ ନବ ଦାସଙ୍କ ହତ୍ୟା କରାଯାଇଥିବା ବେଳେ କ୍ରାଇମବାଞ୍ଚ ଟିମ ୧ ତାରିଖରେ ଗୋପାଳକୁ ପ୍ରଥମେ ୪ ଦିନିଆ ରିମାଣ୍ଡରେ ନେଇଥିଲା । ଏହାପରେ ଗତ ୫ ତାରିଖରେ ପୁଣି ୪ ଦିନିଆ ରିମାଣ୍ଡରେ ନେଇଥିଲା । ଆଜିଠାରୁ ତୃତୀୟ ପର୍ଯ୍ୟାୟ ରିମାଣ୍ଡ ଆରମ୍ଭ ହୋଇଥିବା ବେଳେ ତାଙ୍କର ପଲିଗ୍ରାଫ ଏବଂ ନାର୍କୋ ଟେଷ୍ଟ କରାଯିବ । ଆସନ୍ତାକାଲି(ଶୁକ୍ରବାର) ନାର୍କୋ ଟେଷ୍ଟ ହେବାକୁ ଥିବା ବେଳେ ଆଜି ସ୍ବାସ୍ଥ୍ୟ ପରୀକ୍ଷା ଏବଂ ଫିଟନେସ ଟେଷ୍ଟ କରାଯିବ ।