ଝାରସୁଗୁଡା: ଏମସିଏଲରୁ କୋଇଲା ଚୋରା ଚାଲାଣ ରାକେଟର ପର୍ଦ୍ଦାଫାଶ କରିଛି ଝାରସୁଗୁଡା ଜିଲ୍ଲା ପୋଲିସ। କୋଇଲା ଖଣିରେ ନିୟୋଜିତ ନିରାପତ୍ତା କର୍ମଚାରୀ ଓ ପେଲୋଡର ଅପରେଟରଙ୍କ ସହାୟତାରେ ଚାଲିଥିଲା କୋଇଲା ଚୋରା କାରବାର। ଲଖନପୁର ପୋଲିସ ଏହି ଘଟଣାରେ ଦୁଇଟି କୋଇଲା ବୋଝେଇ ଟ୍ରକ ଜବତ କରିବା ସହ ୬ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ସୂଚନାନୁସାରେ, ଗତ ୮ ତାରିଖ ଦିନ ସମସ୍ତ କାଗଜ ପତ୍ର କରାଇ ଟ୍ରକ ନଂ.OR23B-8634 ଓ OR09Q-9221 କୋଇଲା ଲୋଡ କରି ଲଖନପୁର ମାଇନସରୁ ଯାଇ ଟ୍ରକ ମାଲିକ ଇଟ୍ଟାଭାଟିମାନଙ୍କରେ କୋଇଲା ବିକ୍ରି କରିଛନ୍ତି ।
ଏହାପରେ ପୁଣି ଗତ ୯ ତାରିଖ ଅପରାହ୍ନରେ ଟ୍ରକ ଦୁଇଟିରୁ କୋଇଲା ଖାଲି କରି ଫେରି ଆସି ପୁଣି ମାଇନ୍ସର ଗେଟ ପାଖକୁ ନେଇ ଆସିଥିଲେ । ପରେ ସିକ୍ୟୁରିଟି ଗାର୍ଡଙ୍କ ସହ କଥା ହୋଇ ଟ୍ରକ ଗୁଡିକୁ ରେଜିଷ୍ଟ୍ରରରେ ଏଣ୍ଟ୍ରି ନ କରାଇ ୯ ତାରିଖ ସଂଧ୍ୟା ସମୟରେ ଖଣି ଭିତରକୁ ପ୍ରବେଶ କରିଥିଲେ। ଏହାପରେ ଲୋଡିଙ୍ଗ ଅପରେଟରଙ୍କ ସହ ମିଶି ସିକ୍ୟୁରିଟି ସ୍ଲିପ୍ ଜାଲିଆତି କରି କୋଇଲା ଲୋଡ କରେଇଥିଲେ । କୋଇଲା ଲୋଡ କରି ସାରିବା ପରେ କୋଇଲା ମାଫିଆମାନେ ଗେଟରେ ଥିବା ସିକ୍ୟୁରିଟି ଗାର୍ଡ ମହେଶ କୁମାର ଭୋଇ ସହ କଥା ହୋଇ ଟ୍ରକ ଦ୍ବୟକୁ ଗତ 9 ତାରିଖ ରାତି ପ୍ରାୟ ୧୦ଟା ସମୟରେ ଆଉଟ ଗେଟ ଦେଇ ବାହାରକୁ ବାହର କରିଥିଲେ। ତେବେ ଗତ ୮ରେ ତିଆରି କରିଥିବା କାଗଜ ପତ୍ର ଧରି ଦ୍ବିତୀୟ ଥର କୋଇଲା ଚାଲାଣ କରୁଥିବା ବେଳେ ସେମାନେ ଧରାପଡିଯାଇଛନ୍ତି ।