ଝାରସୁଗୁଡା:ଭୁଲ ଇଞ୍ଜେକସନ ଦେବାରୁ ଚାଲିଗଲା ଶିଶୁର ଜୀବନ । ଏଭଳି ଏକ ସଙ୍ଗୀନ ଅଭିଯୋଗ ଆସିଛି ଝାରସୁଗୁଡା ଜିଲ୍ଲା ବ୍ରଜରାଜନଗର ଥାନା ଅଞ୍ଚଳରୁ । ମୃତକ ହେଲେ ବ୍ରଜରାଜନଗର ଥାନା ଅନ୍ତର୍ଗତ ଶାସ୍ତ୍ରୀନଗରର ତୁଳସୀ ମହାନନ୍ଦ(୬) । ଭୁଲ ଇଞ୍ଜେକସନ ଯୋଗୁଁ ଝିଅର ମୃତ୍ୟୁ ହୋଇଥିବା ଅଭିଯୋଗ ଆଣିଛନ୍ତି ମୃତ ତୁଳସୀର ମା ପିଙ୍କି ମହାନନ୍ଦ । ଶିଶୁର ମୃତ୍ୟୁ ପରେ ଯୁବତୀଙ୍କ ମୃତଦେହକୁ ଥାନା ଆଗରେ ରଖି ଧାରଣାରେ ବସିଛନ୍ତି ଗ୍ରାମବାସୀ ।
ସୂଚନାଅନୁସାରେ, ବ୍ରଜରାଜନଗର ଥାନା ଅନ୍ତର୍ଗତ ଶାସ୍ତ୍ରୀନଗରର ଝିଅ ତୁଳସୀ ମହାନନ୍ଦର ମୁହଁ ଓ ବେକରେ କିଛି ଫଳିଯିବାରୁ ତାକୁ ଚିକିତ୍ସା ପାଇଁ ଗାନ୍ଧୀ ଛକରେ ଥିବା ଏକ ଘରୋଇ କ୍ଲିନିକକୁ ନେଇଥିଲେ । ସେଠାରେ ଡାକ୍ତର ସରୋଜ ପ୍ରଧାନ ଦେଖି ତୁଳସୀକୁ ଏକ ଇଞ୍ଜେକସନ ଦେଇଥିଲେ । ଇଞ୍ଜେକସନ ନେବାପରେ ତୁଳସୀ ସଂଜ୍ଞାହୀନ ହୋଇପଡିଥିଲା । ଶେଷରେ ଉପାୟ ନପାଇ ଡାକ୍ତର ସରୋଜ ନିଜ କ୍ଲିନିକ ଷ୍ଟାଫଙ୍କ ଦ୍ୱାରା କେନ୍ଦ୍ରୀୟ ଚିକିତ୍ସାଳୟ ମଣ୍ଡାଳିଆ ପଠାଇ ଦେଇଥିଲା । ସେଠାରେ ଡାକ୍ତର ପରୀକ୍ଷା କରି ଅବସ୍ଥା ଜଟିଳ ଥିବା ଜାଣିପାରି ଝାରସୁଗୁଡାକୁ ସ୍ଥାନାନ୍ତର କରିଥିଲେ । ଝାରସୁଗୁଡାରେ ଏକ ଘରୋଇ କ୍ଲିନିକରେ ତୁଳସୀଙ୍କ ମୃତ୍ୟୁ ହୋଇଛି। ମୃତଦେହ ବ୍ରଜରାଜନଗର ପହଁଚିବା ପରେ ଗ୍ରାମବାସୀ ମାନେ ଗତକାଲି(ବୁଧବାର)ରାତି ୯ଟାରୁ ବ୍ରଜରାଜନଗର ଥାନା ଆଗରେ ଧାରଣାରେ ବସିଛନ୍ତି ।
ଇଟିଭି ଭାରତ, ଝାରସୁଗୁଡା