ଯାଜପୁର: ହରିଦାସପୁର ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ସ୍ମିତାରାଣୀ ବିଶ୍ବାଳଙ୍କ ମୃତ୍ୟୁକୁ ନେଇ ଲାଗି ରହିଛି ସସପେନ୍ସ । ଏହା ହତ୍ୟା ନା ଆତ୍ମହତ୍ୟା ତାକୁ ନେଇ ଚାଲିଛି ନାନା କଳ୍ପନା ଜଳ୍ପନା । ଏପଟେ ଏହି ଘଟଣାରେ ପୋଲିସ ସରପଞ୍ଚଙ୍କ ସ୍ବାମୀ ରୂପେସ ଭଦ୍ରଙ୍କ ସମେତ 5ଜଣଙ୍କୁ ଅଟକ ରଖି ତଦନ୍ତ ଆରମ୍ଭ କରିଛି ।
ପୁରା ଘଟଣା ଏମିତି, ଗତ ବୁଧବାର ସ୍ମିତା ଭତ୍ତା ବାଣ୍ଟିବାକୁ ଯାଇଥିଲେ । ତାଙ୍କ ସହ ଉପସ୍ଥିତ ଥିଲେ ସରପଞ୍ଚଙ୍କ ସ୍ବାମୀ ରୂପେସ୍ ଭଦ୍ର ଓ ତାଙ୍କର କେତେକ ସହକର୍ମୀ । ଭତ୍ତା ବଣ୍ଟନ ଶେଷ ହେବାପରେ ସ୍ମିତାରାଣୀଙ୍କୁ ସେମାନେ ଲଞ୍ଚ୍ କରିବାକୁ ଗେଷ୍ଟହାଉସକୁ ନିମନ୍ତ୍ରଣ କରିଥିଲେ । ସେଠାରେ ସ୍ମିତାରାଣୀ ଦୁଇ ମହଲାରେ ଥିବା ବାଥରୁମକୁ ଯିବାକୁ କହି କୋଠରୀରୁ ଆଉ ବାହାରି ନଥିଲେ । ଦୀର୍ଘ ସମୟ ଧରି ସେ କୋଠରୀରୁ ନ ବାହାରିବାରୁ ସମସ୍ତଙ୍କ ସନ୍ଦେହ ହୋଇଥିଲା । ଏହାପରେ କବାଟ ତାଡିବାରୁ ତାଙ୍କ ଝୁଲନ୍ତା ମୃତଦେହ ଦେଖିବାକୁ ପାଇଥିଲେ ସମସ୍ତ ।
ଅନ୍ୟପଟେ ସ୍ମିତା ଆତ୍ମହତ୍ୟା କରିଥିବା କଥାକୁ ସହଜରେ ବିଶ୍ବାସ କରି ପାରୁନାହାନ୍ତି ତାଙ୍କ ସ୍ବାମୀ । ସ୍ମିତାଙ୍କ ସ୍ବାମୀ ସୁଶିଲ କହିଛନ୍ତି ଯେ, ସ୍ମିତା କେବେ ବି ଆତ୍ମହତ୍ୟା କରିପାରିବେ ନାହିଁ । ତାଙ୍କୁ ବିଭିନ୍ନ ଅନିୟିତତା କାମ ପାଇଁ ମାନସିକ ଚାପ ଦିଆଯାଉଥିଲା । ସେପଟେ ସ୍ମିତାଙ୍କ ଶରୀରରେ ଅନେକ କ୍ଷତ ଚିହ୍ନ ଥିବାରୁ ତାଙ୍କ ଆତ୍ମହତ୍ୟା କରିବା କଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।