ଯାଜପୁର:ସୁକିନ୍ଦା ଅଞ୍ଚଳରେ ଚାଞ୍ଚଲ୍ୟ । ରାସ୍ତା କଡ଼ରୁ ମଣିଷ କଟା ଗୋଡ଼ ପରେ ଆଜି ଡ୍ରେନ ଭିତରୁ ଅଜଣା ବ୍ୟକ୍ତିଙ୍କ ଗଳିତ ମୃତଦେହ ଉଦ୍ଧାର ହୋଇଛି । ଗତ ଦୁଇଦିନ ତଳେ ରାସ୍ତା କଡରୁ ଏକ କଟା ଗୋଡ ଉଦ୍ଧାର କରାଯାଇଥିଲା । ତେବେ ଏ ଗୋଡ କାହାର ତାହା ଜଣାପଡିନଥିବା ବେଳେ ମଙ୍ଗଳପୁର ଛକ ଜାତୀୟ ରାଜପଥ କଡ଼ରେ ଥିବା ଡ୍ରେନ ମଧ୍ୟରୁ ମୃତଦେହ ଉଦ୍ଧାର କରାଯାଇଛି । ମୃତଦେହ ନିକଟରୁ ଖାଲି ବ୍ୟାଗ, ଏଟିଏମ୍ କାର୍ଡ ଜବତ ହୋଇଛି ।
ଅଧିକ ପଢନ୍ତୁ:-ସୁକିନ୍ଦାରେ ଚାଞ୍ଚଲ୍ୟ, ରାସ୍ତାକଡରେ ପଡିଛି ମଣିଷର କଟା ଗୋଡ
ସୂଚନାଅନୁଯାୟୀ, ଗତକାଲି ସନ୍ଧ୍ୟାରେ ଏକ ଅଜଣା ବ୍ୟକ୍ତିଙ୍କ ମୃତଦେହ ପଡ଼ି ରହିଥିବା ଦେଖି ସ୍ଥାନୀୟ ଲୋକେ ସୁକିନ୍ଦା ପୋଲିସକୁ ସୂଚନା ଦେଇଥିଲେ । ସୁକିନ୍ଦା ପୋଲିସ ଘଟଣାସ୍ଥଳରେ ପହଞ୍ଚି ଦମକଳ ବାହିନୀର କର୍ମଚାରୀ ଓ ଓଡ଼ିଶା ପୋଲିସର ସ୍ଵତନ୍ତ୍ର ସାଇଣ୍ଟଫିକ ଉପସ୍ଥିତରେ ଜେସିବି ମେସିନ ସାହାଯ୍ୟରେ ଡ୍ରେନ ସ୍ଲାପ ଉଠାଯାଇ ମୃତଦେହକୁ ଉଦ୍ଧାର କରିଥିଲା । ତେବେ ମୃତଦେହରେ ଗୋଟିଏ ଗୋଡ଼ ନଥିବା ଦେଖିବାକୁ ମିଳିଥିବା ବେଳେ ପୂର୍ବରୁ ରାସ୍ତା କଡରୁ ଉଦ୍ଧାର ହୋଇଥିବା ଗୋଡ ଏହି ଅଜଣା ବ୍ୟକ୍ତିଙ୍କ ହୋଇଥାଇପାରେ ବୋଲି ସନ୍ଦେହ କରାଯାଉଛି । ଏନେଇ ଅଧିକ ଯାଞ୍ଚ କରିବା ପରେ ଘଟଣା ସ୍ପଷ୍ଟ ହେବ ।
ତେବେ ଉଦ୍ଧାର ହୋଇଥିବା ମୃତଦେହଟି ଜଣେ ମାନସିକ ଭିନ୍ନକ୍ଷମଙ୍କର ବୋଲି ସ୍ଥାନୀୟ ଲୋକେ ଅନୁମାନ କରିଛନ୍ତି । ଏହି ବ୍ୟକ୍ତି ଜଣକ ଡ୍ରେନରେ ପଡିବା ପରେ ପ୍ରାଣ ହରାଇଥାଇପାରନ୍ତି ବୋଲି ସନ୍ଦେହ କରାଯାଉଛି। । ଉଭୟ ସୁକିନ୍ଦା ପୋଲିସ ଓ ସାଇଣ୍ଟିଫିକ ଟିମ ଘଟଣାର ତଦନ୍ତ କରୁଛି । ତଦନ୍ତ ପରେ ସତ ସାମ୍ନାକୁ ଆସିବ ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ