ଯାଜପୁର: ଆସନ୍ତାକାଲି ହେଉଛି ବିଶ୍ବ ପରିବେଶ ଦିବସ । ସାରା ରାଜ୍ୟରେ ନଦୀ ମାନଙ୍କୁ ସୁରକ୍ଷା ପ୍ରଦାନ ଓ ପ୍ରଦୂଷଣ ମୁକ୍ତ କରିବା ଲାଗି ଆଜିଠୁ ଯାଜପୁରରୁ ଆରମ୍ଭ ହୋଇଛି ନଦୀ ସୁରକ୍ଷା ଅଭିଯାନ । ଏହି ଅବସରରେ ଲୋକଶକ୍ତି ଅଭିଯାନର ସଭାପତି ତଥା ପରିବେଶବିତ୍ ପ୍ରଫୁଲ୍ଲ ସାମନ୍ତରାୟ ସାମିଲ ହୋଇ ନଦୀ ମାନଙ୍କୁ ହତ୍ୟା କରିବା ଲାଗି ସରକାର ଚେଷ୍ଟା କରୁଥିବା କହିଥିଲେ ।
ଭିଡିଓ ସୌଜନ୍ୟ: ସମ୍ବାଦଦାତା, ଯାଜପୁର
ସାମନ୍ତରାୟ କହିଛନ୍ତି ଯେ କମ୍ପାନୀ ମାନଙ୍କୁ ପାଣି ଯୋଗାଇବାକୁ ଏଠି ପ୍ରତିଯୋଗିତା ଚାଲିଛି । ସୂଚନାଯୋଗ୍ୟ, ଯାଜପୁର ଜିଲ୍ଲାରେ କଳକାରଖାନା ବୃଦ୍ଧି ପାଇବା ସାଙ୍ଗକୁ ନଦୀଜଳ ପ୍ରଦୂଷଣର ଭୟାବହତା ମଧ୍ୟ ବଢୁଛି । ଚାଷଜମି ମାନଙ୍କୁ ଜଳସେଚନର ବ୍ୟବସ୍ଥା ନଥିବା ବେଳେ ଶିଳ୍ପସଂସ୍ଥା ମାନେ ନଦୀରୁ ଇନଟେକୱେଲ ଜରିଆରେ ପ୍ରଚୂର ପରିମାଣର ଜଳ ବ୍ୟବହାର କରୁଛନ୍ତି । ଯାହାଦ୍ବାରା ନଦୀରେ ଜଳସ୍ତର ହ୍ରାସ ପାଇବା ସହିତ ଖରାଦିନ ପୂର୍ବରୁ ନଦୀ ଗୁଡ଼ିକ ଶୁଷ୍କ ହୋଇଯାଉଛନ୍ତି ।